अनरको ८.७ इन्चको ट्याब्लेट ‘प्याड एक्स७’ सार्वजनिक

काठमाडौं ।

अनरले आफ्नो कम मूल्यको नयाँ ट्याब्लेट प्याड एक्स७ लन्च गरेको छ।

नयाँ अनर प्याड एक्स७ मा ९० हर्ज रिफ्रेस रेट र ६२५–निट पीक ब्राइटनेस भएको ८.७ इन्चको १३४०x८०० एलसीडी स्क्रिन, स्न्यापड्रागन ६८० एसओसी, ६जीबी सम्मको र्याम, १२८जीबी सम्मको विस्तारयोग्य स्टोरेज र १० वाटको वायर्ड चार्जिङ र रिभर्स वायर्ड चार्जिङको लागि समर्थन भएको ७,०२० एमएएच ब्याट्री रहेको छ।

जीएसएमएरिनाका अनुसार एन्ड्रोइड १५ अपरेटिङ सिस्टम भएको यो ट्याब्लेटमा ८ मेगापिक्सेलको रियर क्यामरा र ५ मेगापिक्सेलको फ्रन्ट क्यामरा रहेको छ। यो ट्याब्लेट खैरो रङ्गमा मात्र उपलब्ध हुनेछ। यसको मापन २११.८ x १२४.८ x ७.९९ एमएम र तौल ३६५ ग्राम रहेको छ।

अनरले डिभाइसले ४२ ओटा “कडा रिलायबिलिटी परीक्षणहरू” पार गरेको बताउँदै बलियो र भरपर्दो भएको ग्यारेन्टी गरेको छ। उक्त ४२ ओटा परीक्षणहरुमा क्रसिङ इम्प्याक्टहरू, अप्रत्याशित ड्रपहरू, चरम वातावरणहरूका साथै स्टील बल इम्प्याक्ट परीक्षण, टचस्क्रिन क्लिक ड्युरेबिलिटी परीक्षण र डिस्टोर्सन परीक्षण समावेश रहेका छन्।

अनर प्याड एक्स७ को ४जीबी र्याम र १२८जीबी स्टोरेज भर्सन साउदी अरेबियामा पहिले नै अनरको अनलाइन स्टोरमा उपलब्ध  छ। यसको मूल्य ९३ अमेरिकी डलर कायम गरिएको छ।

सीमित समयको लागि प्रदान गरिएको हालको यो मूल्य एक हप्ता भन्दा बढीमा समाप्त हुने जनाइएको छ र त्यस पछि ट्याब्लेटको मूल्य ११९ अमेरिकी डलर हुने जीएसएमएरिनाले रिपोर्ट गरेको छ।