Technology Khabar २६ असार २०८२, बिहीबार
काठमाडौं ।
गीतसंगीत र कला क्षेत्रमा भइरहेको साइबर अपराध तथा विकृति नियन्त्रण गर्न गृह मन्त्रालयले साइबर ब्युरोमा ‘फोकल पर्सन’ तोक्ने निर्णय गरेको छ।
बिहीबार गृह मन्त्रालयमा राष्ट्रिय लोक तथा दोहोरीगीत प्रतिष्ठान नेपालका प्रतिनिधि टोलीसँगको भेटमा गृहमन्त्री रमेश लेखकले यो निर्णयको जानकारी दिएका हुन्।
उनले प्रहरी महानिरीक्षक (आईजीपी) दीपक थापा र साइबर ब्युरो प्रमुख प्रहरी नायव महानिरीक्षक (डीआईजी) नवीन्द अर्याललाई फोकल पर्सन तोकेर जिम्मेवारीपूर्वक काम अगाडि बढाउन निर्देशन दिएका छन्।
गृहमन्त्री लेखकले सामाजिक सञ्जाल र डिजिटल माध्यममा फैलिएको विकृति र द्वेष फैलाउने गतिविधिहरूको रोकथाममा निष्कर्षसहित गम्भीरतापूर्वक अघि बढ्ने प्रतिबद्धता व्यक्त गरे। उनले भने, “गीतसंगीतका माध्यमबाट समाजमा घृणा, लान्छना र अपमान फैलाउने कार्य रोक्नुपर्नेछ। यसका लागि हामी संरचित रुपमा अघि बढ्छौं।”
यसै प्रसङ्गमा गृहमन्त्री लेखकले गीतसंगीत र कला क्षेत्रसँग सम्बन्धित साइबर अपराध तथा अनलाइन विकृतिमाथि निगरानी राख्न एक विशेष फोकल पर्सन तोक्ने निर्देशन दिएका हुन्।
प्रहरी महानिरीक्षक दीपक थापाले पनि नागरिकलाई यस्ता समस्यामा प्रहरीमा उजुरी दिन आग्रह गरे।
प्रतिष्ठान नेपालकी अध्यक्ष एवं लोकगायिका देवी घर्ती थापाको नेतृत्वमा पुगेको टोलीले गृहमन्त्री समक्ष तीज पर्वलाई लक्षित गरेर प्रसारणमा आएका अश्लील तथा अमर्यादित गीतहरूको नियन्त्रणको मागसमेत गरेको थियो।
यसैबीच, राष्ट्रिय लोकसञ्चारकर्मी नेपालले पनि गृहमन्त्रीलाई ध्यानाकर्षण पत्र बुझाउँदै तीजको सन्दर्भमा यस्ता गीतप्रति गम्भीर ध्यान दिन आग्रह गरेको छ।
पत्र प्राप्त गरेपछि गृहमन्त्री लेखकले सरकार यस विषयमा गम्भीर रहेको बताएका छन्।
प्रकाशित: २६ असार २०८२, बिहीबार
