एप्पलको एआई विभागका शीर्ष कार्यकारी रुओमिङ पाङले कम्पनी छाड्दै, मेटामा जान लागेको आशंका

काठमाडौं ।

एप्पलमा कृत्रिम बुद्धिमत्ता (एआई) मोडलहरूको जिम्मेवारी सम्हालिरहेका शीर्ष कार्यकारी रुओमिङ पाङ कम्पनी छाडेर मेटा प्लेटफर्म्समा जान लागेका छन् भनेर ब्लूमबर्ग न्युजले सोमबार स्रोतहरू उद्धृत गर्दै जनाएको छ।

पाङ कम्पनीको एप्पल फाउण्डेशन मोडल्स टीमका म्यानेजर हुन्। उनी मेटाको नयाँ सुपरइन्टेलिजेन्स टीममा आबद्ध हुनेछन् र वार्षिक करोडौं डलरको क्षतिपूर्ति प्याकेज पाउने बताइएको छ।

मेटा र एप्पल दुवैले यो विषयमा टिप्पणी अनुरोधमा तत्काल प्रतिक्रिया नदिएको रोयटर्सले उल्लेख गरेको छ।

यो विषय मेटालगायतका प्रविधि कम्पनीहरू एआई क्षेत्रमा नेतृत्व लिन उच्च-प्रोफाइल प्रतिभाहरूलाई भर्ती गर्न आक्रामक रूपमा अघि बढिरहेका र बहु करोड डलरको प्रस्ताव गरिरहेका बेला आएको हो।

रोयटर्सले गत हप्ता जनाए अनुसार मेटाका सीईओ मार्क जुकरबर्गले कम्पनीको एआई प्रयासहरूलाई मेटा सुपरइन्टेलिजेन्स ल्याब्स नामक नयाँ डिभिजन अन्तर्गत पुनः संरचना गरेका छन्।

यो नयाँ डिभिजनको नेतृत्व डाटा लेबलिङ स्टार्टअप स्केल एआईका पूर्व सीईओ अलेक्जान्ड्र वाङले गर्नेछन्। उनी अब सोसल मिडिया कम्पनीको मुख्य एआई अधिकारी हुने स्रोतले जनाएको छ।

गत महिनामा मेटाले स्केल एआईमा लगानी गरेको थियो, जसअनुसार सो स्टार्टअपको मूल्यांकन २९ अर्ब डलर पुगेको थियो र त्यसका २८ वर्षीय सीईओ वाङ पनि मेटामा आबद्ध भएका थिए।