काठमाडौं ।
ओपनएआईले आफ्नो कृत्रिम बुद्धिमत्ता प्रविधि प्रयोग गरेर गोप्य अभियान सञ्चालन गरिरहेका चिनियाँ समूहहरूको सङ्ख्या बढ्दै गएको जनाएको छ। च्याटजीपीटी निर्माता कम्पनीले बिहीबार सार्वजनिक गरेको प्रतिवेदनमा यो जानकारी दिएको हो।
सान फ्रान्सिस्कोस्थित स्टार्टअप कम्पनीका अनुसार यस्ता समूहहरूले प्रयोग गर्ने रणनीति र दायरा विस्तार हुँदै गएको भए पनि ती अभियानहरू सामान्यतया सानो स्तरका थिए र सीमित दर्शकलाई लक्षित गरिएका थिए।
रोयटर्सका अनुसार च्याटजीपीटी सन् २०२२ को अन्त्यतिर सार्वजनिक भएपछि मानवजस्तै लेख, तस्बिर र अडियो तुरुन्तै र सजिलै उत्पादन गर्न सक्ने जेनेरेटिभ एआई प्रविधिका सम्भावित असरप्रति चिन्ता बढेको थियो।
ओपनएआईले उल्लेख गरेको अर्को उदाहरणमा, चीनसँग सम्बन्धित साइबर खतराका समूहहरूले एआई प्रविधि विभिन्न चरणमा प्रयोग गरेका थिए — जसमा खुला स्रोत अनुसन्धान, स्क्रिप्ट परिमार्जन, प्रणाली कन्फिगरेसनमा समस्या समाधान, पासवर्ड ब्रुट फोर्सिङ र सामाजिक सञ्जाल स्वचालनका उपकरण विकास जस्ता काम समावेश छन्।
तेस्रो उदाहरणमा, ओपनएआईले चीनबाट सुरू भएको एउटा प्रभाव अभियान फेला पारेको छ, जसले अमेरिकी राजनीतिक बहसमा विभाजन ल्याउने विषयहरूमा दुवै पक्षको समर्थनमा सामाजिक सञ्जाल सामग्रीहरू उत्पादन गरेको थियो। यसमा एआईबाट सिर्जित टेक्स्ट र प्रोफाइल तस्बिरहरू पनि प्रयोग गरिएका थिए।
ओपनएआईका यी दावीबारे चीनको विदेश मन्त्रालयले टिप्पणी अनुरोधमा तुरुन्तै कुनै प्रतिक्रिया नदिएको रोयटर्सले लेखेको छ।
ओपनएआई हाल विश्वका सबैभन्दा मूल्यवान निजी कम्पनीमध्ये एक बनेको छ। कम्पनीले ३०० अर्ब डलर मूल्याङ्कनसहित ४० अर्ब डलरको लगानी चरण घोषणा गरेपछि यस्तो स्थिति आएको हो।
प्रकाशित: २३ जेष्ठ २०८२, शुक्रबार
