Technology Khabar १८ जेष्ठ २०८२, आईतवार
काठमाडौं ।
जापानी अटोमोबाइल कम्पनी होन्डाले आफ्नो पहिलो इलेक्ट्रिक मोटरसाइकल लन्च गरेको छ। चीनमा उपलब्ध गराइएका ई-भीओ (E-VO) लाई होन्डाले आफ्नो चिनियाँ साझेदार ग्वाङ्झाउसँगको सहकार्यमा डिजाइन र विकास गरेको हो।
यो वुयाङ-होन्डा (Wuyang-Honda) ब्रान्ड अन्तर्गत प्रस्तुत गरिएको हो।
ई-भीओ इलेक्ट्रिक मोटरसाइकल दुई भेरियन्टमा उपलब्ध गराइएको छ। यस इलेक्ट्रिक मोटरसाइकलको ४.१ किलोवाट आवर डुअल-ब्याट्री प्याक भेरियन्टको रेन्ज लगभग १२० किलोमिटर छ र ६.२ किलोवाट आवर भेरियन्टको रेन्ज १७० किलोमिटर छ। तिनीहरूको मूल्य क्रमशः २९,९९९ चिनियाँ युआन (लगभग ५ लाख ७० हजार रुपैयाँ) र ३६,९९९ चिनियाँ युआन (लगभग ७ लाख ३ हजार रुपैयाँ) छ। यसको ४.१ किलोवाट आवर भेरियन्टको तौल लगभग १४३ किलोग्राम छ। यसलाई पूर्णरूपमा चार्ज गर्न लगभग १.५ घण्टा लाग्छ। यसको अधिकतम गति लगभग ११० किलोमिटर प्रतिघण्टा छ।
‘ई-भीओ’को ६.२ किलोवाट आवर भेरियन्टको तौल लगभग १५६ किलोग्राम छ। यसलाई पूर्णरूपमा चार्ज गर्न लगभग २.५ घण्टा लाग्छ। यसमा तीनओटा राइडिङ मोडहरू छन् – इको, नर्मल र स्पोर्टस्।
यस इलेक्ट्रिक मोटरसाइकलका दुवै भेरियन्टहरूमा १५.३ किलोवाटको पीक पावर आउटपुटको साथ एउटै इलेक्ट्रिक मोटर छ। यसको अगाडि र पछाडि सिंगल डिस्क ब्रेक र डुअल-च्यानल एबीएस छ। ईभी ओ मा ड्यास क्याम छ। यसको ४.१ किलोवाट आवर भेरियन्टमा फ्रन्ट क्यामरा छ र ६.२ किलोवाट आवर भेरियन्टमा रियर ड्यास क्याम छ।
यस इलेक्ट्रिक मोटरसाइकलका दुवै भेरियन्टहरूमा सात इन्चको दुईओटा डिस्प्ले छन्, जसले नेभिगेसन, राइडिङ मोड चयन र संगीत नियन्त्रण जस्ता सुविधाहरुमा पहुँच दिन्छ।
यसअघि, होन्डा मोटरसाइकल एण्ड स्कूटर (एचएमएसआई) ले यस वर्षको सुरुमा भारतमा आफ्नो धेरै बिक्री हुने स्कूटर एक्टिभाको इलेक्ट्रिक संस्करण लन्च गरेको थियो।
प्रकाशित: १८ जेष्ठ २०८२, आईतवार
