Technology Khabar १४ जेष्ठ २०८२, बुधबार
काठमाडौं ।
अष्ट्रेलियाको कम्पनी नियामक निकायले असफल क्रिप्टोकरेन्सी एक्सचेन्ज कम्पनी ब्लकचेन ग्लोबलका पूर्व निर्देशक लिआङ (एलन) गुओविरुद्ध नागरिक जरिवाना प्रक्रिया सुरु गरेको छ। गुओमाथि कर्तव्यको अनेकौं उल्लङ्घन गरेको आरोप लगाइएको उक्ता निकायले बुधबार घोषणा गरेको हो।
अष्ट्रेलियन सेक्युरिटीज एन्ड इन्भेस्टमेन्ट्स कमिसन (एएसआईसी) ले फेडेरल अदालतमा गुओले ब्लकचेन ग्लोबलमार्फत सञ्चालित क्रिप्टोकरेन्सी एक्सचेन्ज प्लेटफर्म एसीएक्स एक्सचेन्जसँग सम्बन्धित कार्यमा संलग्न भएको आरोप लगाएको छ।
एसीएक्स एक्सचेन्ज सन् २०१९ डिसेम्बरतिर ध्वस्त भएको थियो, जब ग्राहकहरूले आफ्नो खाताबाट रकम वा क्रिप्टोकरेन्सी झिक्न नसक्ने अवस्था सुरु भएको थियो।
रोयटर्सका अनुसार आरोपहरू गुओले एसीएक्स एक्सचेन्जका ग्राहकहरूको रकमसँग गरेको व्यवहार, त्यससम्बन्धी दिएका अभिव्यक्तिहरू र कम्पनीका खातापुस्तकहरू उचित तरिकाले राख्नुपर्ने कर्तव्यसँग सम्बन्धित छन्।
नियामक निकायले ब्लकचेन ग्लोबलको खारेजी गर्ने निकायबाट प्रतिवेदन प्राप्त गरेपछि २०२४ जनवरीमा अनुसन्धान सुरु गरेको थियो। उक्त प्रतिवेदन अनुसार २०२३ अक्टोबर २ सम्म ब्लकचेन ग्लोबलले करिब ५८ मिलियन अष्ट्रेलियन डलर (३७.३ मिलियन अमेरिकी डलर) असुरक्षित ऋणदाताहरूलाई तिर्न बाँकी रहेको देखिएको थियो।
गुओलाई २०२४ फेब्रुअरीमा देश छाड्न निषेध गरिएको थियो, तर यात्रा प्रतिबन्ध आदेशको म्याद सकिएपछि उनी २०२४ सेप्टेम्बर २३ मा अष्ट्रेलियाबाट बाहिरिएको नियामकले जनाएको छ।
प्रकाशित: १४ जेष्ठ २०८२, बुधबार
