काठमाडौं ।
उबरले मंगलबार चीनको पोनी डट एआईसँग साझेदारी गरेर मध्यपूर्वको प्रमुख बजारमा स्वचालित ट्याक्सी सञ्चालनमा ल्याउने घोषणा गरेको छ। पोनी डट एआई चीनमा आधारित स्वचालित ट्याक्सी विकास गर्ने कम्पनी हो, जसका गाडीहरू अब उबरको राइड-हेलिङ प्लेटफर्ममा प्रयोग गरिनेछन्।
यो साझेदारी उबर ले स्वचालित सवारी साधन (रोबोट्याक्सी) क्षेत्रको उपस्थितिलाई मजबुत बनाउने लक्ष्यसहित गरेको पछिल्लो प्रयास हो।
रोयटर्सका अनुसार साझेदारी यो वर्षको अन्त्यतिर मध्यपूर्वको एक प्रमुख बजारमा सुरु हुनेछ र भविष्यमा अन्य अन्तर्राष्ट्रिय बजारहरूमा विस्तार गरिनेछ।
शुरुआती परीक्षण चरणमा पोनी डट एआईका गाडीहरूमा सुरक्षा अपरेटर रहनेछ, र त्यसपछि मात्र ती पूर्ण रूपमा स्वचालित व्यावसायिक सेवामा रूपान्तरण गरिनेछन्।
पछिल्ला केही हप्ताहरूमा उबरले नयाँ साझेदारीहरूमा हस्ताक्षर गर्नुका साथै पहिलेका सहकार्यहरूलाई पनि विस्तार गरेको छ, जसको उद्देश्य लिफ्ट र विद्युतीय गाडी निर्माता टेस्लासँगको प्रतिस्पर्धामा अघि बढ्नु हो।
गत हप्ता उबरले स्वचालित प्रविधि कम्पनीहरू मे मोबिलिटी र मोमेन्टासँग सम्झौता गरेको थियो र हालै चीनको वीराइडसँगको साझेदारीलाई १५ नयाँ सहरहरूमा विस्तार गरेको छ। गत वर्ष उबरले अल्फाबेट अन्तर्गतको वेमोसँगको साझेदारी पनि विस्तार गरेको थियो।
नभेम्बरमा नास्ड्याकमा सूचीबद्ध पोनी डट एआईको शेयर मूल्य पूर्व-बजार कारोबारमा करिब १३ प्रतिशतले बढेको छ, जबकि उबर को शेयर १ प्रतिशतले घटेको छ।
इन्जिनियरिङ र नियामक चुनौतीहरूका बाबजुद, प्रविधि तथा विद्युतीय गाडी कम्पनीहरू स्वचालित प्रणाली विकास गर्न र व्यापक रूपमा व्यावसायिक रोबोट्याक्सी सेवा सुरु गर्न दौडिरहेका छन्।
संयुक्त राज्य अमेरिकाको संघीय सरकारले पनि स्वचालित सवारी साधनहरूलाई केही सुरक्षा आवश्यकताबाट छुट दिँदै तिनीहरूको तैनाथीलाई सहज बनाइरहेको छ, तर घटनाको अनिवार्य प्रतिवेदन भने कायम राखिएको रोयटर्सले उल्लेख गरेको छ।
पोनी डट एआई सन् २०१६ मा स्थापना भएको हो र टोयोटाद्वारा लगानी गरिएको कम्पनी हो। ग्वाङ्झाउमा आधारित यो कम्पनीले दक्षिण कोरिया, लक्सेम्बर्ग, मध्यपूर्व र अन्य देशहरूमा विस्तार गर्ने योजना बनाइरहेको छ। हाल यस कम्पनीसँग बेइजिङ, सांघाई, ग्वाङ्झाउ र शेन्जेनमा रोबोट्याक्सी सेवा सञ्चालनको अनुमति छ, र हङकङमा सेवा सुरु गर्ने तयारी गरिरहेको छ।
प्रकाशित: २४ बैशाख २०८२, बुधबार
