अमेजनले इन्टरनेट कन्स्टलेशनका लागि प्रक्षेपण गर्यो २७ ओटा स्याटेलाइट, स्टारलिंकलाई टक्कर दिने

काठमाडौं ।

अमेरिकाको फ्लोरिडाबाट सोमबार अमेजनको कुइपर ब्रोडब्यान्ड इन्टरनेट कन्सटेलेशनका लागि पहिलो २७ ओटा स्याटेलाइट प्रक्षेपण गरियो। यससँगै स्पेसएक्सको स्टारलिंकसँग प्रतिस्पर्धा गर्न लागिएको अन्तरिक्षमा आधारित इन्टरनेट नेटवर्कको धेरै ढिलो भएको सुरुआत भएको छ।

यी भूउपग्रहहरू ३,२३६ मध्येका पहिलो हुन्, जसलाई अमेजनले प्रोजेक्ट कुइपर अन्तर्गत पृथ्वीको नजिकको कक्षमा पठाउने योजना बनाएको छ।

सन् २०१९ मा सार्वजनिक गरिएको १० अर्ब डलरको यो प्रयासले उपभोक्ता, व्यवसाय र सरकारहरूलाई विश्वव्यापी रूपमा ब्रॉडब्यान्ड इन्टरनेट उपलब्ध गराउने लक्ष्य राखेको छ—जसका लागि स्पेसएक्सले आफ्नो शक्तिशाली स्टारलिंक सेवामार्फत वर्षौंदेखि ग्राहकहरूलाई आकर्षित गरिरहेको छ।

बोइङ र लकहीड मार्टिनको संयुक्त उपक्रम युनाइटेड लञ्च एलायन्सको एटलस भी रकेटको माथिल्लो भागमा राखिएका २७ स्याटेलाइटहरू सोमबार साँझ ७ बजे (पूर्वी अमेरिकी समय अनुसार) केप क्यानाभेरल स्पेस फोर्स स्टेशनस्थित प्रक्षेपणस्थलबाट प्रक्षेपण गरियो। अप्रिल ९ मा प्रस्तावित पहिलो प्रक्षेपण प्रयास खराब मौसमका कारण रद्द गरिएको थियो।

कुइपर अमेजनको हालसम्मकै सबैभन्दा ठूलो परियोजनामध्ये एक हो, जसले स्टारलिंक र एटीएण्डटी तथा टी-मोबइलजस्ता विश्वव्यापी दूरसञ्चार प्रदायकहरूसँग प्रतिस्पर्धा गर्नेछ। कम्पनीले यस सेवालाई इन्टरनेट जडान कम भएको वा हुँदै नभएको ग्रामीण क्षेत्रहरूमा लाभदायक हुने दावी गर्दै आएको छ।

पहिलो सञ्चालन योग्य उपग्रहहरू प्रक्षेपण गर्ने यो मिसन एक वर्षभन्दा बढी ढिला भएको हो—अमेजनले सुरुमा २०२४ को सुरुआतमै पहिलो ब्याच प्रक्षेपण गर्ने आशा राखेको थियो।

अमेरिकी संघीय सञ्चार आयोग (एफसीसी) ले अमेजनलाई आफ्नो कुल कन्स्टेलेशनको आधा—१,६१८ उपग्रह—सन् २०२६ को मध्यसम्म प्रक्षेपण गर्नुपर्ने समयसीमा दिएको छ, तर ढिलो सुरुआत भएकाले अमेजनले समयावधि थप माग्ने सम्भावना रहेको विश्लेषकहरू बताउँछन्।

रोयटर्सका अनुसार प्रक्षेपणपछिका केही घण्टा वा दिनभित्र, अमेजनले वाशिंगटनस्थित आफ्नो मिसन अपरेसन सेन्टरबाट सबै उपग्रहहरूसँग प्रारम्भिक सम्पर्क स्थापित भएको पुष्टि गर्ने अपेक्षा गरिएको छ। सबै कुरा योजना अनुसार भएमा, कम्पनीले यसै वर्षभित्र ग्राहकहरूलाई सेवा दिन थाल्ने अपेक्षा गरेको जनाएको छ।

यूएलएका प्रमुख कार्यकारी अधिकृत टोरी ब्रुनोले यस महिनाको एक अन्तर्वार्तामा बताएअनुसार यूएलएले यस वर्ष कुइपरका पाँचवटा थप मिसनहरू प्रक्षेपण गर्न सक्नेछ।

अमेजनले सन् २०२० मा एफसीसीमा बुझाएको दस्तावेजअनुसार, ५७८ उपग्रह पुगेपछि केही उत्तरी र दक्षिणी क्षेत्रमा सेवा सुरु गर्न सकिनेछ, र थप उपग्रहहरू प्रक्षेपण गर्दै जाँदा सेवा पृथ्वीको भूमध्यरेखातर्फ विस्तार हुँदै जानेछ।

वेब सेवा र ई-कमर्समा अगाडि रहेको अमेजनको प्रोजेक्ट कुइपर एउटा महत्त्वाकांक्षी अन्तरिक्ष अभियान हो, जसले स्पेसएक्सद्वारा प्रभुत्व जमाइएको बजारमा ढिलो प्रवेश गरेको हो। तर अमेजनका कार्यकारीहरूले कम्पनीको उपभोक्ता उत्पादन अनुभव र स्थापित क्लाउड कम्प्युटिङ व्यवसायले कुइपर लाई स्टारलिंकसँग प्रतिस्पर्धामा अग्रस्थानमा पुर्‍याउने विश्वास व्यक्त गरेका छन्।