विद्युतीय सवारीहरूका लागि ५सी फास्ट चार्जिङ प्रविधि ल्याउने एक्सपेङको घोषणा

काठमाडौं ।

चिनियाँ विद्युतीय सवारी निर्माता एक्सपेङका सीईओले बुधबार कम्पनीले करिब २ लाख युआन (२७,३७५ डलर) मूल्य पर्ने विद्युतीय सवारीहरूका लागि ५सी फास्ट चार्जिङ प्रविधि ल्याउने घोषणा गरेका छन्।

सीईओका अनुसार कम्पनीले आफ्ना सिक्सजी र जी९ एसयूभी मोडेलहरूमा स्मार्ट असिस्टेड ड्राइभिङ क्षमता ‘स्ट्यान्डर्ड कन्फिगरेसन’ को रूपमा उपलब्ध गराएको छ।

एक्सपेङ एउटा चिनियाँ विद्युतीय सवारी (ईभी) निर्माता कम्पनी हो जुन सन् २०१४ मा स्थापना भएको हो। यसको मुख्यालय ग्वाङ्झाउ, चीनमा रहेको छ। कम्पनीको उद्देश्य स्मार्ट र इनोभेटिभ इलेक्ट्रिक कारहरू उत्पादन गर्नु हो, जसमा कृत्रिम बुद्धिमत्ता (एआई) र स्वचालित ड्राइभिङ प्रविधिहरूको विशेष ध्यान दिइन्छ।

संस्थापकहरू हे श्याओपेंग, हेनरी शिआ र हो झिएले सन् २०१४ मा स्थापना गरेको यो कम्पनीले मुख्यगरी जी३ नामको एसयूभी, पी७ नामको सेडान, जी९ नामको फ्ल्यागशिप एसयूभी, जी६ नामको नयाँ मिड-साइज एसयूभी, पी५ नामको लाईडार प्रविधिसहितको सेडान उत्पादन गर्दै आएको छ।

कम्पनीको विशेषताहरुमा स्वचालित ड्राइभिङ (एक्सपाइलट सिस्टम), स्मार्ट ककपिट, ओटीए अपडेट, ईभी इफिसियन्सी लगायतका रहेका छन् भने मुख्य बजार चीन रहेको कम्पनीले हालै युरोपेली बजारमा पनि विस्तार गरेको छ।