Technology Khabar ९ बैशाख २०८२, मंगलवार
काठमाडौं ।
स्पेसएक्सले अन्तर्राष्ट्रिय अन्तरिक्ष स्टेशन (आईएसएस) तर्फ आफ्नो ३२औं कार्गो मिसन सोमबार बिहान (अप्रिल २१) सफलतापूर्वक प्रक्षेपण गरेको छ। यस मिसनमार्फत नासाका लागि ३ टनभन्दा बढी सामान र वैज्ञानिक उपकरणहरू कक्षमा पठाइएको छ।
मानवबिहीन कार्गो ड्रागन यान बोकेको फाल्कन ९ रकेट सोमबार बिहान ४:१५ बजे ईडीटी (०८:१५ जीएमटी) मा फ्लोरिडाको केनेडी स्पेस सेन्टरस्थित लञ्च कम्प्लेक्स एलसी ३९ए बाट उडेको हो।
सीआरएस-३२ (वा SpX-32) नाम दिइएको यो मिसन नासा र स्पेसएक्सबीचको दोस्रो व्यावसायिक आपूर्ति सेवा सम्झौताअन्तर्गतको १२औं प्रक्षेपण हो।
स्पेस डटकमका अनुसार फाल्कन ९ को पहिलो चरणको बूस्टर प्रक्षेपणपछि करिब आठ मिनेटमा केप क्यानाभेरल स्पेस फोर्स स्टेशनको ल्याण्डिङ जोन-१ मा ठाडो रूपमा सफल अवतरण गर्यो। स्पेसएक्सका अनुसार यो बूस्टरको यो तेस्रो उडान र अवतरण हो।
यो ड्रागन यानको भने पाँचौं उडान हो। यसअघि यसले सीआरएस-२२, सीआरएस-२४, सीआरएस-२७ र सीआरएस-३० मा पनि उडान भरेको थियो।
आईएसएसमा कार्यरत एक्सपेडिशन ७३ टोलीका लागि आवश्यक खाना र उपकरणसँगै सीआरएस-३२ ड्रागन यानले विभिन्न वैज्ञानिक प्रयोगहरू र प्रविधि परीक्षणहरू पनि लगेको छ।
तीमध्ये, चन्द्रमा र मङ्गल ग्रहमा भविष्यमा जानुपर्ने खतराबाट बच्न सहयोग पुर्याउने उन्नत वायु गुणस्तर निगरानी प्रणाली, स्वतन्त्र रूपमा सर्ने रोबोटहरूको परिष्कृत गतिविधि परीक्षण, र सापेक्षताको सिद्धान्तजस्ता आधारभूत भौतिक शास्त्रीय अवधारणाहरू अध्ययन गर्न प्रयोग गरिने दुईवटा एटोमिक घडीहरू पनि रहेका छन्।
कुल ६,७०० पाउन्ड (३,०४० किलोग्राम) सामान र वैज्ञानिक उपकरणहरू आईएसएस मा पठाइएको हो। योजना अनुसार सबैकुरो ठीक भएमा, ड्रागन यान मंगलबार (अप्रिल २२) बिहान ८:२० बजे ईडीटी (१२:३० जीएमटी) मा अन्तरिक्ष स्टेशनमा पुग्नेछ।
सीआरएस-३२ ड्रागन यान एक महिना जति अन्तरिक्ष स्टेशनमा रहने अपेक्षा गरिएको छ। यो अवधिमा यसबाट ल्याइएका सामग्रीहरू अनलोड गरिनेछ, अनि फोहोर र पृथ्वी फर्काइने वैज्ञानिक उपकरणहरू हालेर पुनः प्रस्थान गरिनेछ। त्यसपछि यान पृथ्वी फर्किनेछ र क्यालिफोर्नियाको तट नजिक समुद्रमा अवतरण गर्नेछ।
प्रकाशित: ९ बैशाख २०८२, मंगलवार
