भविष्यमा आफ्ना केही एआई मोडल चलाउन प्रमाणित परिचयपत्र आवश्यक पर्नसक्ने ओपनएआईको भनाई

काठमाडौं ।

ओपनएआईले निकट भविष्यमै केही नयाँ एआई मोडलहरू प्रयोग गर्न संगठनहरूले परिचय (आईडी) प्रमाणिकरण प्रक्रिया पूरा गर्नुपर्ने व्यवस्था ल्याउन सक्ने संकेत दिएको छ। गत हप्ता कम्पनीको वेबसाइटमा प्रकाशित एक सहायता पृष्ठअनुसार यो प्रक्रिया भेरिफाइड अर्गनाइजेशन नामको हुनेछ।

ओपनएआईका अनुसार भेरिफाइड अर्गनाइजेशनएक नयाँ उपाय हो जसले डेभलपर्सलाई ओपनएआई प्लेटफर्ममा रहेका अत्याधुनिक मोडलहरू र क्षमताहरू प्रयोग गर्न अनुमति दिनेछ। यो प्रक्रिया अन्तर्गत, ओपनएआई को एपीआईले समर्थन गरेका देशहरूको सरकारद्वारा जारी गरिएको आईडी आवश्यक हुनेछ। एउटै आईडीले हरेक ९० दिनमा एक मात्र संगठनलाई प्रमाणित गर्न सक्नेछ, र सबै संगठनहरू यो प्रक्रियाका लागि योग्य नहुन सक्ने कम्पनीले जनाएको छ।

सहायता पृष्ठमा लेखिएको छ: “ओपनएआईमा हामी एआईलाई सबैलाई पहुँचयोग्य र सुरक्षित रूपमा प्रयोग गर्न सकियोस् भन्ने जिम्मेवारी गम्भीर रूपमा लिन्छौं। दुर्भाग्यवश, केही थोरै संख्यामा रहेका डेभलपर्सले जानाजान हाम्रो एपीआई प्रयोग नीतिहरूको उल्लंघन गर्छन्। हामीले एआई को असुरक्षित प्रयोग न्यूनीकरण गर्न प्रमाणिकरण प्रक्रिया थपिरहेका छौं, ताकि उन्नत मोडलहरू व्यापक समुदायका डेभलपर्सलाई उपलब्ध गराउन सकियोस्।”

रोयटर्सका अनुसार यस प्रकारको प्रमाणिकरण प्रक्रिया कम्पनीका उत्पादनहरू दिन-प्रतिदिन शक्तिशाली बन्दै जाँदा सुरक्षालाई सुदृढ गर्न ल्याइएको हुन सक्ने अनुमान गरिएको छ। ओपनएआईले उत्तर कोरियामा आधारित भएको दाबी गरिएका समूहहरूले गरेको दुरुपयोग पत्ता लगाउने र नियन्त्रण गर्ने आफ्नो प्रयासबारे विगतमा धेरै रिपोर्टहरू प्रकाशित गरिसकेको छ।

यो कदम बौद्धिक सम्पत्ति चोरी रोक्नका लागि एभको भन्ने अनुमान गरिएको छ। ब्लूमबर्गको एक रिपोर्ट अनुसार, ओपनएआई ले सन् २०२४ को अन्त्यतिर डीपसिक सँग सम्बन्धित रहेको चीनको एक एआई प्रयोगशालाले आफ्ना एपीआईमार्फत ठूलो मात्रामा डाटा चोरेर मोडल प्रशिक्षणका लागि प्रयोग गरेको आशंकामा अनुसन्धान गरिरहेको थियो। यस्तो कार्य ओपनएआई को सेवा सर्तको उल्लंघन हो।

ओपनएआईले चीनमा आफ्ना सेवाहरूको पहुँच सन् २०२४ को गर्मीमा बन्द गरिसकेको छ।