भारतमा जोमाटोले निकाल्यो ६०० कर्मचारी, अब एआईले उनीहरूको काम गर्ने

काठमाडौं ।

भारतीय फुड डेलिभरी कम्पनी जोमाटोले आफ्नो ग्राहक सहयोग विभागबाट करिब ६०० कर्मचारीलाई बर्खास्त गरेको छ र त्यसको साट्टो एआई प्रयोग गर्ने बताएको छ। कम्पनीको फुड डेलिभरी व्यवसायको वृद्धि सुस्त भइरहेको र यसको द्रुत वाणिज्य इकाई (क्विक कमर्स यूनिट) ब्लिंकिट निरन्तर घाटामा रहेको समयमा यी कर्मचारी कटौती गरिएका हुन्।

कम्पनीले हालै आफ्नो एआई-संचालित ग्राहक समर्थन प्लेटफर्म ‘नगेट’ (Nugget) लन्च गरेको छ, जसले अहिले हरेक महिना १ करोड ५० लाखभन्दा बढी ग्राहक अन्तरक्रियाहरू ह्यान्डल गरिरहेको छ। नगेटले कुनै पनि मानवीय सहयोग बिना ८० प्रतिशतसम्म समस्याहरू समाधान गर्न सक्षम छ, जसले कम्पनीको लागत घटाउन मद्दत गर्ने बताईएको छ।

भारतीय मिडिया मनीकन्ट्रोलको रिपोर्ट अनुसार, जोमाटोले एक वर्षअघि आफ्नो जोमाटो एसोसिएट एक्सेलेरेटर प्रोग्राम (जेएएपी) अन्तर्गत ग्राहक सहयोगका लागि १,५०० कर्मचारीहरूलाई नियुक्त गरेको थियो। यस कार्यक्रम अन्तर्गत, कर्मचारीहरूले एक वर्ष भित्र बिक्री, सञ्चालन, कार्यक्रम व्यवस्थापन, समर्थन, आपूर्ति श्रृंखला र श्रेणी टोलीहरूमा स्थायी भूमिकामा सर्ने अवसर पाउने थिए।

तर, अब यी अस्थायी कर्मचारीहरूको सम्झौता थप गरिएको छैन्। रिपोर्टका अनुसार गुरुग्राम र हैदराबादमा काम गर्ने ‘जेएएपी’ कर्मचारीहरूलाई कुनै आधिकारिक घोषणा बिना नै राजीनामा दिन भनिएको थियो। प्रभावित कर्मचारीहरूलाई एक महिनाको तलब बाहेक कुनै सूचना अवधि दिइएको थिएन। कम्पनीले कर्मचारी कटौतीको कारण खराब प्रदर्शन र समयनिष्ठाको अभाव रहेको बताएको छ।

“गत वर्ष जेएएपी (ZAAP) कार्यक्रम अन्तर्गत भर्ना गरिएका अधिकांश कर्मचारीहरूलाई गत हप्ता कुनै ठोस कारण बिना नै निकालिएको थियो। गुरुग्राम र हैदराबाद कार्यालयहरूमा वातावरण तनावपूर्ण बनेको छ,” एक अवस्थित ग्राहक समर्थन कर्मचारीले भनेका छन्।

कर्मचारीहरूले बताएअनुसार जोमाटोको एआई-आधारित समर्थन प्रणालीका कारण उनीहरूको जागिर जोखिममा छ। यसअघि, डिसेम्बर २०२२ मा पनि, जोमाटोले १०० कर्मचारीलाई बर्खास्त गरेको थियो, जुन यसको कुल कार्यबलको ४ प्रतिशत थियो। त्यसपछि उत्पादन, प्रविधि, क्याटलग र मार्केटिङ विभागहरूमा कर्मचारी कटौती गरिएको थियो।