मोबाइल ब्रोडब्याण्ड इन्टरनेट चलाउनेको संख्या एक महिनामै १ लाख २० हजार हाराहारीले बढ्यो

काठमाडौं ।

नेपालमा मोबाइल ब्रोडब्याण्ड इन्टरनेट सेवा चलाउनेको संख्या २०८१ माघ मसान्तसम्म २ करोड ६१ लाख १७ हजार ९०२ पुगेको छ।

यो सङ्ख्या चालु आर्थिक वर्षको सो अवधिसम्म टुजी, थ्रीजी र फोरजी सेवा लिनेहरुको समग्र आँकडा हो।

हालै नेपाल दूरसञ्चार प्राधिकरणले सार्वजनिक गरेको २०८१ माघ मसान्तसम्मको तथ्यांक अनुसार मोबाइल ब्रोडब्याण्ड इन्टरनेट सेवा प्रयोगकर्ताहरुको संख्या अघिल्लो महिना अर्थात् पौषको तुलनामा १ लाख १८ हजार ८२७ ले बढेको हो। यो सङ्ख्या मंसिरबाट पुस मसान्तसम्म आइपुग्ने क्रममा भने उल्लेख्य घटेको थियो।

२०८१ माघ महिनाको समग्र २ करोड ६१ लाख १७ हजार ९०२ ग्राहकमध्ये नेपाल टेलिकमका समग्र मोबाइल ब्रोडब्यान्ड प्रयोगकर्ताको सङ्ख्या १ करोड ४१ लाख ५६ हजार ९९१ रहेको छ।

यो सङ्ख्यामा टुजीका प्रयोगकर्ता शून्य छ भने थ्रीजीका ७ लाख ८२ हजार ३००, फोरजीका १ करोड ३३ लाख ७४ हजार ९६१ समावेश छन्।

तथ्यांकअनुसार एनसेलका समग्र मोबाइल ब्रोडब्यान्ड प्रयोगकर्ता  १ करोड, १९ लाख, ६० हजार ९११ तथा फोरजीका ६९ लाख ५० हजार ४७९ रहेका छन्। यीमध्ये थ्रीजीका प्रयोगकर्ता १ लाख ३८ हजार ५६१ र फोरजी १ करोड १८ लाख २२ हजार ३५० रहेका छन्।

फोरजी: टेलिकमको उलेख्य बढ्यो, एनसेलले गुमायो 

पौष महिनाको तुलनामा माघ मसान्तसम्म नेपाल टेलिकमले फोरजी सेवा लिने ग्राहक उल्लेख्य थपेको छ भने एनसेलले गुमाएको छ।

फोरजीका हकमा १ महिनामा नेपाल टेलिकमले २ लाख १६ हजार ८५४ ग्राहक थपेको छ। यस्तै एनसेलले ९५ हजार २३२ ग्राहक गुमाएको प्रतिवेदनले देखाएको छ।

थ्रीजी: टेलिकमले थप्यो, एनसेलले गुमायो

२०८१ माघ महिनासम्ममा नेपाल टेलिकमले आफ्ना थ्रीजी प्रयोगकर्ताको सङ्ख्या अघिल्लो महिनाको तुलनामा ६ हजार २६५ ग्राहक थपेको छ। हाल नेपाल टेलिकमका थ्रीजी प्रयोगकर्ता ७ लाख ८२ हजार ३०० पुगेका छन्। यो आकडा पौष मसान्तसम्म ७ लाख ७६ हजार ३५ रहेको थियो।

एनसेलले भने ९ हजार ६० ग्राहक गुमाउँदै समग्रमा आफ्ना थ्रीजी प्रयोगकर्ताको सङ्ख्या १ लाख ३८ हजार ५६१ मा झारेको छ। यो आँकडा पौष महिनासम्म १ लाख ४७ हजार ६२८ रहेको थियो।