सुपर कम्प्युटर विस्तारका लागि ईलन मस्कको एक्सएआईले किन्यो १० लाख वर्गफिट जग्गा

काठमाडौं ।

अर्बपति ईलन मस्क स्वामित्वको कृत्रिम बुद्धिमत्ता कम्पनी एक्सएआईले टेनेजी राज्यको दक्षिण-पश्चिम मेम्फिसमा १० लाख वर्गफुट क्षेत्रफलको सम्पत्ति खरिद गरेको छ। यो जानकारी शुक्रबार ग्रेटर मेम्फिस चेम्बरले दिएको हो। कम्पनीले प्रतिस्पर्धा तीव्र भइरहेको एआई उद्योगमा आफ्नो पूर्वाधार विस्तार गर्ने लक्ष्य राखेको छ।

नयाँ लगानी कम्पनीको गत डिसेम्बरको घोषणामा आधारित छ, जसमा एक्सएआईले कम्तीमा १० लाख ग्राफिक्स प्रोसेसिङ युनिट्स (जीपीयू) समेट्ने गरी आफ्नो कोलोसस सुपरकम्प्युटर विस्तार गर्ने योजना सार्वजनिक गरेको थियो।

कोलोससलाई मस्कको एआई महत्वाकांक्षाका लागि मुख्य परियोजनाको रूपमा हेरिएको छ। ओपनएआई सँगको बढ्दो प्रतिस्पर्धा र च्याटजीपीटी निर्माता कम्पनीका सीईओ साम अल्टम्यानसँगको तनावपछि मस्कले आफ्नो प्रभाव बढाउने प्रयास गरिरहेका छन्। अर्बपति मस्कले कम्पनीको नियन्त्रण लिन खोजेको घटनापछि प्रतिस्पर्धा झन् तीव्र बनेको छ।

चेम्बरका अनुसार कोलोसस सुपरकम्प्युटर “सुपरक्लस्टर आकारतर्फको बाटोमा राम्रोसँग अघि बढिरहेको छ” भनेर डिसेम्बरको घोषणा अनुसार पुष्टि गरिएको छ।

एआई पूर्वाधारको विस्तारले वातावरणीय अभियन्ताहरूबाट आलोचना पाएको छ, किनभने डेटा सेन्टरहरूले ठूलो मात्रामा ऊर्जा खपत गर्छन्।

मेम्फिस चेम्बरले एक्सएआईको नयाँ सुविधा ८ करोड डलरको पानी पुनःप्रयोग गर्ने प्लान्टसँगै निर्माण भइरहेको र डाटा सेन्टर सञ्चालनका लागि टेस्ला मेगाप्याकहरूको संसारकै सबैभन्दा ठूलो प्रयोग गरिने जनाएको रोयटर्सले उल्लेख छ।

बुधबार सार्वजनिक रिपोर्ट अनुसार, मस्कको टेस्लाले टेक्सासमा १० लाख वर्गफुट क्षेत्रफलको नयाँ कारखाना निर्माण गर्नेछ, जसले यसको मेगाप्याक ऊर्जा उत्पादनहरू व्यवस्थापन तथा भण्डारण गर्नेछ।