एप्पलको फोल्डेबल आईफोन अर्को वर्षको उत्तरार्धमा लन्च हुने सम्भावना

काठमाडौं ।

लामो समयदेखि प्रतिक्षा गरिएको एप्पलको फोल्डेबल आईफोन लन्च हुन अझै केही समय लाग्न सक्छ। यसै क्रममा एक ताजा रिपोर्टले फोल्डेबल आईफोनको सम्भावित लन्च समयरेखाको बारेमा संकेत गरेको छ।

एक विश्वसनीय स्रोतबाट आएको यो समाचारले एप्पलको पहिलो फोल्डेबल डिभाइसको लागि ब्रान्डको योजनाहरूको बारेमा केही खुलासा गरेको छ।

फोल्डेबल आईफोन सन् २०२६ को चौथो त्रैमासिकमा डेब्यू हुन सक्छ

प्रसिद्ध एप्पल विश्लेषक मिङ्ग–ची कुओबाट आएको यो पछिल्लो समाचारमा फोल्डेबल डिभाइसको बारेमा विवरणहरू साझा गरेका छन्। उनले यस रिपोर्टमा क्युपर्टिनोमा आधारित कम्पनीले यस वर्षको दोस्रो त्रैमासिकसम्ममा फोल्डेबल आईफोनको सम्पूर्ण स्पेसिफिकेशनलाई अन्तिम रूप दिने योजना बनाएको दावी गरेक छन्।

यद्यपि, यस डिभाइसको रिलीजको लागि एक वर्ष भन्दा बढी समय लाग्न सक्ने बताइएको छ। ब्रान्डले सन् २०२६ को चौथो त्रैमासिकमा फोल्डेबल आईफोन अनावरण गर्ने अपेक्षा गरिएको छ।

एप्पलको पहिलो फोल्डेबल डिभाइस आईफोन १८ लाइनअपको समयसँगै रिलिज हुन सक्ने सम्भावना रहेको उल्लेख गरिएको छ। कुओले पहिलो फोल्डेबल आईफोनको उत्पादन कम्तिमा सन् २०२७ सम्म सीमित हुनेछ भनि थप उल्लेख गरेका छन्।

एप्पलको पहिलो फोल्डेबल प्रोडक्टको ढुवानी सन् २०२६ मा मात्र ३ देखि ५० लाख युनिटको बीचमा पुग्न सक्ने विश्लेषकले विश्वास व्यक्त गरेका छन्। त्यसैगरी सन् २०२७ मा भने यो संख्यालाई २ करोड युनिटमा पुर्याइने बताइएको छ।

कम्पनी आफ्नो प्रिमियम मूल्य ट्यागका लागि परिचित भएकोले कुओले यसको मूल्य निर्धारण सम्भवतः २००० अमेरिकी डलर र २,५०० अमेरिकी डलरको बीचमा हुने दावी गरेका छन्।

एप्पलको पहिलो फोल्डेबल फोन ग्यालेक्सी जेड फोल्ड ६ जस्तै नोटबुक शैलीको मोडेल हुने अपेक्षा गरिएको छ। साथै यो डिभाइस आईफोन हो वा आईप्याड मोडेल हो भन्ने बारेमा भने स्पष्ट छैन।

सामसङ यसको प्राथमिक डिस्प्ले आपूर्तिकर्ता हो भन्ने जस्ता विभिन्न हल्लाहरू पहिले नै भइसकेका छन्। अर्को हल्लाले प्राथमिक स्क्रिन ७.७४ इन्चको भित्री फोल्डिङ प्यानल हुने संकेत गरेको छ जसमा कभर स्क्रिन ५.४९ इन्चको डिस्प्ले हुनेछ भनि गीज्मोचाइनाले उल्लेख गरेको छ।