जर्मनीमा इलेक्ट्रिक कारको बिक्रीमा नाटकीय रूपमा वृद्धि

काठमाडौं ।

गत महिना जर्मनीमा विद्युतीय सवारी साधन (इलेक्ट्रिक कार) को बिक्रीमा उल्लेखनीय वृद्धि भएको छ ।

जनवरी महिनामा मात्रै कुल ३४,४९८ नयाँ विद्युतीय कार दर्ता भएको छ जुन गत वर्षको सोही महिनाको तुलनामा ५३.५ प्रतिशतले वृद्धि भएको र जनवरी महिनाको ऐतिहासिक रेकर्ड भएको उल्लेख गरिएको छ।

त्यसैगरी फेडरल मोटर ट्रान्सपोर्ट अथोरिटी (केबीए) ले बजारमा विद्युतीय कारको हिस्सा १६.६ प्रतिशत पुगेको जनाएको छ।

डिसेम्बर महिनाको लागि नयाँ दर्ता र डेलिभरीहरू स्थगित गरिएको हुनाले विद्युतीय कारको बिक्रीमा वृद्धि हुने अपेक्षा गरिएको छ। यो एक रणनीतिक चाल भएको र यसले कार निर्माताहरूलाई सन् २०२५ को लागि थप अनुकूल स्थितिमा राखेको उल्लेख गरिएको छ।

युरोपेली संघले डिजेल, ग्यासलिनका साथै हाइब्रिड कारहरूबाट कार्बन डाइअक्साइड (सीओ२) उत्सर्जनमा धेरै कडा नियमहरू सेट गरेको बताइएको छ।

त्यसैले नयाँ सवारी साधनहरूको डेलिभरीलाई सन् २०२५ को लागि स्थगित गर्नुमा नै निर्माताहरूको हित हुने उल्लेख गरिएको छ। साथै, निर्माताहरूले कम मूल्यका विद्युतीय कारहरूको साथ खरिदकर्ताहरूलाई आकर्षित गर्ने प्रयास गर्ने बताइएको छ।

यसैबीच, टेस्लालाई जर्मन बजारमा ठूलो धक्का लागेको छ। केवल १,२७७ इकाइहरूका साथ यसको बिक्री ६० प्रतिशतले घटेको छ।

जर्मन बजारमा टेस्लाको यो असफलता टेस्लाका सह–मालिक र सीईओ, इलन मस्कको राजनीतिक स्थितिसँग पनि सम्बन्धित रहेको विश्वास गरिएको छ र मस्कले जर्मन दक्षिणपन्थी पार्टी एएफडीलाई सार्वजनिक रूपमा समर्थन व्यक्त गरेका टेलीग्राफले उल्लेख गरेको छ।