यस्ता छन् सीईएस २०२५ मा प्रस्तुत भएका अत्याधुनिक र रोचक रोबोट तथा तिनीहरुका विशेषता

काठमाडौं ।

भर्खरै लस भेगासमा सम्पन्न कन्ज्युमर इलेक्ट्रोनिक्स शो- सीईएस २०२५  रोबोटहरूको लागि रोचक रह्यो। एआईको प्रगतिले उपयोगी रोबोटहरूको नयाँ लहर ल्याउने अपेक्षा गरिए पनि धेरै रोबोटिक्स कम्पनीहरू अझै पनि एआईलाई प्रभावकारी रूपमा प्रयोग गर्ने तरिका खोज्दै छन्।

सीईएसमा यसपटक थुप्रै प्रकारका मनमोहक साथी रोबोट, अनौठा अवधारणाहरू तथा केही डर लाग्दा मानव-जस्तै रोबोटहरू समावेश थिए। तीमध्ये केहीले गहिरो प्रभाव छोडे। सबैभन्दा धेरै ध्यान आकर्षित गर्न सक्षम केही रोबोट तथा तिनीहरुको विशेषता यस प्रकार छन्:

टीसीएल एआई मी

सीईएसमा देखिएका सबैभन्दा मनमोहक रोबोटहरूमध्ये टीसीएलको एआई मी ( जसलाई एमी  भने उच्चारण गरिन्छ) निकै आकर्षक थियो। यो अवधारणा टीसीएलको स्टलमा प्रदर्शित गरिएको थियो जसले हरेक आगन्तुकलाई अचम्मित र प्रसन्न बनायो।

इन्ग्याजेटका अनुसार यो रोबोटको आवाज र आँखाहरूले सानो बच्चाको झल्को दिने उद्देश्य राख्छ। टीसीएलले यसलाई बालबालिकाको लागि भावनात्मक समर्थन/साथी रोबोटको रूपमा प्रस्तुत गरेको छ।

स्टलमा ‘एमी’ आफ्नो पाङ्ग्रायुक्त अण्डाकार आधारमा घुम्दै मात्र थियो तर कम्पनीका अनुसार यो एआई-शक्ति सम्पन्न रोबोटलाई स्मार्ट होम उपकरणहरू नियन्त्रण गर्न र भिडियो ब्लग (भ्लग) रेकर्ड गर्न प्रयोग गर्न सकिन्छ। यसमा क्यामेरा र एआई क्षमताहरू छन्।

हालका लागि टीसीएलले यो रोबोट बजारमा ल्याउने योजना छ कि छैन भन्ने स्पष्ट छैन। तर यसको सीईएस डेमोमा कम्पनीले धेरै मिहिनेत गरेको देखियो। एउटा रोबोट मक्की बनाइएको बैठक कोठामा घुमिरहेको बेला टीसीएलले ‘एमी’ का लागि विभिन्न पहिरनहरू पनि प्रदर्शन गरेको थियो। ती पहिरनहरुमा भुलभुले खरायोको पोशाक र डेनिम ज्याकेट जस्ता पहिरन समावेश थिए।

रोपेट

रोपेटको स्टलतिर जाँदा कसैले प्लास्टिकको हटडग रोबोटअगाडि हल्लाउँदै थियो र रोबोटका आँखाहरूमा साना कार्टुन हटडगहरू झल्किरहेका थिए। यो क्षण निकै मनमोहक थियो। रोपेटका केही विशेषताहरू पनि आकर्षक थिए। यसले आवाज, स्पर्श र हाउभाउमा प्रतिक्रिया दिन सक्छ।

यसले साना भावनात्मक प्रतिक्रिया पनि देखाउँछ। च्याटजीपीटीको समावेशका कारण संवाद गर्न सक्ने क्षमता पनि राख्ने यो रोपेट मूल रूपमा एकदमै मनमोहक रहेको उल्लेख छ।

मिरुमी

मिरुमी सीईएस २०२५ मा प्रस्तुत ती अनौठा वस्तुहरूमध्ये एक हो, जसले तपाईंलाई एकैचोटि “यो के हो?” र “अहा! मलाई यो निकै मनपर्छ” भन्न बाध्य बनाउँछ। यो सानो, भुलभुले छ र यसको एउटै उद्देश्य भनेको तपाईंलाई मुस्कुराउन बनाउनु हो। यसले वरपर हेर्दै र निर्दोष बालकजस्तै तपाईंलाई हेर्दा यसलाई जोगाउनुपर्ने भावना पैदा हुन्छ।

रोमी

रोमी एउटा संवाद गर्न सक्ने रोबोट हो। यो तपाईंको हातको हत्केलामा अटाउँछ। यो तपाईंलाई कुरा गर्न, गुनासो पोख्न वा समय बिताउनको लागि उपलब्ध छ। यसको नवीनतम मोडल यसपटकको सीईएसमा प्रस्तुत गरियो र यसको मनमोहक अनुहारका अभिव्यक्तिहरूले सबैको मन जित्यो। यसलाई सजिलैसँग घरभरि बोकेर हिँड्न सकिन्छ।

मिरोकी

मिरोकी गत वर्षको सीईएसमा पनि प्रस्तुत गरिएको थियो तर यसपटक एन्च्यान्टेड टूल्स टिमले यसको नयाँ संस्करण र एलएलएम इन्टिग्रेशनजस्ता केही नयाँ क्षमताहरू प्रदर्शन गरे। यसले मानिसहरूलाई हात हल्लाउँदै, ठूलो कार्टुन आँखाहरू झिम्काउँदै, र मृग जस्तै कान हल्लाउँदै गरेको देख्न सकिन्छ। यसरी यसका चालहरु नियाल्दै गर्दा यो मनमोहक हो वा अलिकति डर लाग्दो हो भन्ने निर्धारण गर्न गाह्रो पर्न जान्छ।

स्कर्पिअन

स्कर्पिअन रिचटेक रोबोटिक्सको एआई बारटेन्डर हो। यसलाई हेर्दा यसले ड्रिंक्स वा पेय पदार्थ पस्किरहेको नभए पनि कम्पनीको एडम बोटसँग मिलेर हाल चर्चामा रहेको “Apt.” गीतमा समकालीन नृत्य गरिरहेको थियो। यो आर्थ्रोपोडल रोबोटले के-पप नृत्य पनि गर्न सक्छ।

यूनिट्री जी१ र रोबोट डग

सीईएस २०२५ मा देखिएका सबै रोबोटहरूमध्ये यूनिट्रीका रोबोटहरू सबैभन्दा डरलाग्दा थिए। कम्पनीले आफ्नो नयाँ चारवटा खुट्टा भएको “रोबोट डग” र मानव-जस्तै जी१ रोबोटहरू प्रदर्शन गरेको थियो। मूलतः बोस्टन डाइनामिक्सको स्पट रोबोट जस्तै देखिने चारखुट्टे रोबोटले मानिसहरूको ध्यानाकर्षण गर्न स्टलमा दौडिरहेको, सिढी चढिरहेको, र आफ्नो “पछाडिका खुट्टामा” बसेको देखिन्थ्यो।

युनिट्रीको जी१ मानवरुपी रोबोटले आफ्नो उन्नत क्षमताको प्रदर्शन गर्‍यो तर यसले केही असहज स्थिति पनि सिर्जना गर्‍यो। फोटो खिच्ने क्रममा, करिब ४ फिट अग्लो र ६० पाउन्ड तौल भएको रोबोटले एक्कासि तीव्र गतिमा अघि बढ्दै उपस्थित एक व्यक्तिलाई ठक्कर दियो।

भिडभाड भएको बूथमा फसेका ती व्यक्ति अपरेटरले नियन्त्रण फिर्ता नलिउञ्जेल केही सेकेन्डसम्म रोबोटको लगातार धक्कामा अड्किएका थिए। यो घटना अपरेटरको गल्तीका कारण भएको थियो—गेमप्याडको जोइस्टिक गल्तीले चलाउँदा यस्तो भएको बताइएको छ। यद्यपि यसले यस्ता शक्तिशाली मेसिनलाई सुरक्षित नियन्त्रण गर्नुपर्ने चुनौतिलाई स्पष्ट पारेको छ।

मी-मो

सीईएसमा देखिएका अनौठा रोबोटमध्ये मी-मो पनि एक हो। यो ६ वटा खुट्टा भएको, बत्ती राखिएको टेबलजस्तो देखिने रोबोट हो। यसले शो फ्लोरमा सरेर “हात हल्लाउने” बाहेक धेरै गर्न नसके पनि यसको सम्भावित प्रयोग रोचक रहेको टेकक्रञ्चले उल्लेख गरेको छ।

बहु-भाषा मोडेलद्वारा सञ्चालित, मी-मो आफ्नो वरपरको वातावरणसँग अन्तरक्रिया गर्न डिजाइन गरिएको छ। यसको निर्माताले यसलाई बाल हेरचाह र वृद्ध हेरचाह जस्ता काममा प्रयोग गर्न सकिने बताएका छन्। यसलाई यो वर्षको अन्त्यतिर विकासकर्ताहरू र अनुसन्धानकर्ताहरूका लागि डेभ-किटका रूपमा उपलब्ध गराइनेछ।

रीची २

पोलन रोबोटिक्सले  सीईएसमा रीची २ नामक रोबोट प्रस्तुत गर्‍यो जसको मूल्य ७५,००० डलर थियो। यो ओपन सोर्स रोबोट टेलि-अपरेशन र डाटा संकलनको लागि डिजाइन गरिएको हो। यसलाई मानवरुपी पाइलटले चलाउने गर्छ र टाढाबाट नियन्त्रण गर्न उपयुक्त मानिएको छ। यसको मूल्य व्यवसायिक र अनुसन्धानकर्ताहरूलाई लक्षित भए पनि, यसको आकर्षण यसको डिजाइनमा छ। यसले हात हल्लाउने जस्ता मनमोहक गतिविधिले मानिसलाई आकर्षित गर्ने गर्छ।