अल्बानियामा टिकटकमाथि यसकारण लाग्यो एक वर्षका लागि प्रतिबन्ध

काठमाडौं ।

शनिबार अल्बानियाले लोकप्रिय छोटो भिडियो एप टिकटकलाई एक वर्षका लागि प्रतिबन्ध लगाउने घोषणा गरेको छ। गएको महिना एक किशोरको हत्या पछि सामाजिक सञ्जालले बालबालिकामा पार्ने असरप्रति चिन्ता बढेपछि यो निर्णय गरिएको हो।

प्रधानमन्त्री एडी रामाले देशभरका अभिभावक समूह र शिक्षकसँगको बैठकपछि यो प्रतिबन्ध विद्यालयहरूलाई थप सुरक्षित बनाउने योजनाको भागस्वरूप अर्को वर्षको सुरुमा लागू हुने बताएको रोयटर्सले उल्लेख गरेको छ। “एक वर्षका लागि हामी यसलाई पूर्ण रूपमा बन्द गर्नेछौं। अब अल्बानियामा टिकटक रहनेछैन,” रामाले भने।

फ्रान्स, जर्मनी र बेल्जियमलगायतका केही युरोपेली देशहरूले पनि बालबालिकाका लागि सामाजिक सञ्जालको प्रयोगमा प्रतिबन्ध लगाएका छन्। नोभेम्बरमा अष्ट्रेलियाले १६ वर्ष मुनिका बालबालिकाका लागि सामाजिक सञ्जालमा पूर्ण प्रतिबन्ध लगाउँदै Big Tech लाई लक्षित गर्ने कडा नियम लागू गरेको थियो।

रामाले सामाजिक सञ्जाल, विशेष गरी टिकटकले विद्यालय भित्र र बाहिरका युवाहरूमा हिंसालाई बढावा दिएको आरोप लगाएका छन्।

उनको सरकारको यो निर्णय नोभेम्बरमा एक १४ वर्षीय स्कुले विद्यार्थीको सहपाठीद्वारा चक्कु प्रहार गरी हत्या गरेपछि आएको हो। स्थानीय मिडियाका अनुसार उक्त घटना सामाजिक सञ्जालमा भएका विवादहरू पछि भएको थियो। टिकटकमा हत्या समर्थन गर्ने नाबालिगहरूको भिडियो पनि देखा परेको बताइएको छ।

“आजको समस्या हाम्रो बालबालिका होइन, हाम्रो समाज हो, टिकटक र यस्ता अन्य प्लेटफर्महरू हुन्, जसले हाम्रा बालबालिकालाई बन्धक बनाइरहेका छन्,” रामाले भने।

टिकटकले अल्बानियाली सरकारसँग “तात्कालिक स्पष्टता” मागेको बताएको छ।

“हामीले घटनाका दोषी वा पीडितसँग टिकटक खाता जोडिएको कुनै प्रमाण भेटेनौं। धेरै रिपोर्टहरूले यो घटना टिकटक होइन, अर्को प्लेटफर्ममा पोस्ट गरिएका भिडियोहरू पछि भएको पुष्टि गरेका छन्,” टिकटकका प्रवक्ताले भने।