काठमाडौं ।
ब्राजिलको प्रतिस्पर्धा नियामक क्याडेले सोमबार एप्पललाई इन-एप खरिदका लागि भुक्तानी विधिमा लगाएको प्रतिबन्ध हटाउन आदेश दिएको छ। यो निर्णय लाटिन अमेरिकाको ई-कमर्स कम्पनी मर्काडोलिब्रेले दायर गरेको उजुरीमा अनुसन्धान अघि बढाउने क्रममा गरिएको हो।
एप्पलले ब्राजिलमा यसबारे टिप्पणी गर्न अस्वीकार गरेको छ भने मर्काडोलिब्रेले सामान्य काम समयबाहिर गरिएको टिप्पणी अनुरोधमा तुरुन्तै प्रतिक्रिया दिएको छैन।
रोयटर्सले उल्लेख गरे अनुसार मर्काडोलिब्रेले २०२२ मा ब्राजिल र मेक्सिकोमा दायर गरेको उजुरीमा एप्पललाई डिजिटल सामग्री र इन-एप खरिद वितरणमा प्रतिबन्ध लगाएको आरोप लगाएको छ। यसमा तेस्रो पक्षका डिजिटल सामग्री र सेवाहरू (जस्तै फिल्म, संगीत, भिडियो गेम, पुस्तक र लेख सामग्री) वितरण गर्न एपहरूलाई रोक लगाएको उल्लेख छ।
उजुरीमा मर्काडोलिब्रेले एप्पलले डिजिटल सामग्री वा सेवा प्रदान गर्ने विकासकर्तालाई एप्पलकै भुक्तानी प्रणाली प्रयोग गर्न बाध्य पारेको र खरिदकर्तालाई उनीहरूको वेबसाइटतर्फ रिडाइरेक्ट गर्न रोक लगाएको भन्दै आलोचना गरेको छ।
क्याडेले एप्पललाई विकासकर्ताहरूलाई एपभित्रै अन्य भुक्तानी विकल्प प्रयोग गर्न दिन आदेश दिएको छ, साथै ग्राहकले बाहिरका वेबसाइटहरूबाट सेवा वा उत्पादन किन्न सक्ने गरी हाइपरलिङ्कजस्ता उपकरणहरू थप्न दिनुपर्ने निर्णय गरेको छ।
एप्पलले यी उपायहरू लागू गर्न २० दिनको समय पाएको छ। क्याडेले यदि एप्पलले आदेश पूरा गर्न असफल भएमा दैनिक २,५०,००० ब्राजिलियन रियल (झण्डै ४३,००० डलर) जरिवाना तिर्नुपर्ने बताएको छ।
प्रकाशित: १२ मंसिर २०८१, बुधबार
