इलन मस्कको एक्स बन्यो भारतको अग्रणी समाचार एप

काठमाडौं ।

डजी डिजाइनर नामका एक प्रयोगकर्ता ले एक्स (पहिलेको ट्विटर) भारतमा एप्पलको एपस्टोरमा शीर्ष समाचार एप बनेको जानकारी दिएको पोस्ट गरेपछि अर्बपति इलन मस्कले यसलाई पुष्टि गर्दै उक्त प्लेटफर्म वास्तवमै भारतमा नम्बर एक समाचार एप बनेको पुष्टि गरेका छन्।

मस्कले अक्टोबर २०२२ मा ४४ अर्ब डलरमा एक्स (पहिलेको ट्विटर) खरिद गरेका थिए। डजी डिजाइनरले शुक्रबार पोस्ट गर्दै भनेका थिए, “एक्स अब भारतमा एपस्टोरको नम्बर १ समाचार एप भएको छ।”

स्टाटिस्टा डटकमका अनुसार भारत ट्विटर प्रयोगकर्ताको संख्याका आधारमा करिब २५ मिलियनभन्दा बढी प्रयोगकर्ताहरू सहित विश्वमा तेस्रो स्थानमा रहेको न्युज१८ले उल्लेख गरेको छ।

यो घोषणापछि मस्कका अनुयायीहरूले प्लेटफर्मको प्रशंसा गरेका थिए। एक प्रयोगकर्ता ‘हिटम्यान हब’ले भने, “एक्सले अष्ट्रेलियामा नम्बर १ स्थान कब्जा गरेको छ! यहाँबाट धेरै माया। एक्स जर्मनीमा पनि नम्बर १ बनेको छ! यहाँ शीर्ष स्थानमा पुग्न पाउँदा धन्य महसुस गर्दैछु। एक्स अब ब्राजिलमा नम्बर १ बनेको छ! ब्राजिलको यो अद्भुत ऊर्जा धन्यवाद। एक्सले भारतमा पनि नम्बर १ स्थान लिएको छ! भारतमा यस्तो माया र समर्थन देख्न अद्भुत लाग्यो।”

त्यसैबीच, २०२४ को संयुक्त राज्य अमेरिका राष्ट्रपतिको चुनावले डोनाल्ड ट्रम्पको विजय पुष्टि गरेपछि, एक्सले २०२२ मा मस्कले प्लेटफर्म खरिद गरेयताकै सबैभन्दा ठूलो प्रयोगकर्ता पलायनको सामना गर्‍यो। प्रयोगकर्ताहरू ब्लुस्काई जस्ता वैकल्पिक प्लेटफर्मतर्फ सरेका थिए।