कनेक्ट आईपीएसमार्फत हुने भुक्तानी रकम तथा कारोबार बढ्दो, असोज महिनासम्म भयो ६ खर्बमाथिको कारोबार

काठमाडौं ।

नेपालमा कनेक्ट आईपीएसमार्फत हुने भुक्तानी रकम तथा कारोबार पछिल्लो तीन महिनामा बढ्दो क्रममा रहेको पाइएको छ। नेपाल राष्ट्र बैंकले हालै सार्वजनिक गरेको चालु आर्थिक वर्षको तेस्रो महिना अर्थात् २०८१ असोजसम्मको बृहत् आर्थिक विवरण अनुसार कनेक्ट आईपीएसमार्फत हुने भुक्तानी कारोबारको रकम तथा सङ्ख्या दुवैमा क्रमश: वृद्धि हुँदै आएको पाइएको हो।

विवरण अनुसार चालु आर्थिक वर्षको पहिलो महिना अर्थात् साउनमा कनेक्ट आईपीएसमार्फत ५ खर्ब, २५ अर्ब ३३ करोड ८० लाख रुपैयाँ कारोबार भएको देखिएको छ।

यो रकम दोस्रो महिना अर्थात् २०८१ भदौमा बढेर ५ खर्ब ३१ अर्ब ४६ करोड ५० लाख रुपैयाँ पुगेको छ। यसबाहेक तेस्रो महिना अर्थात् असोज महिनामा  महिनामा यो रकम ६ खर्ब १७ अर्ब २९ करोड ९० लाख रुपैयाँ पुगेको देखिन्छ।

यसरी हेर्दा साउनबाट भदौ पुग्दा समग्र कारोबार रकम ६ अर्ब १२ करोड ७० लाख रुपैयाँ बढेको देखिन्छ भने अर्को महिना अर्थात् भदौबाट असोज मसान्तसम्म पुग्दा ८५ अर्ब ८३ करोड ४० लाख रुपैयाँको उल्लेख्य वृदद्धि भएको देखिन्छ।

कारोबार सङ्ख्याका हिसाबले हेर्दा असोजमा कनेक्ट आईपीएसमार्फत ७४ लाख ९४ हजार १३६ पटक कारोबार भएको पाइएको छ। अघिल्लो महिना अर्थात् भदौमा कनेक्ट आईपीएसमार्फत ६८ लाख ५६ हजार ८८५ पटक कारोबार भएको थियो। यस्तै साउन महिनामा कनेक्ट आईपीएसमार्फत ६८ लाख ४४ हजार ६७८ पटक कारोबार भएको पाइएको छ।

तुलनात्मक रुपमा हेर्दा साउन मसान्तदेखि भदौ मसान्तसम्मको कारोबार सङ्ख्यामा १२ हजार २०७ पटक तथा भदौ मसान्तदेखि असोज मसान्तसम्म कनेक्ट आईपीएसमार्फत हुने कारोबार सङ्ख्यामा ६ लाख ३७ हजार २५१ पटक ले बढोत्तरी भएको विवरणमा उल्लेख छ।

विवरणका आधारमा हेर्ने हो भने नेपालमा पछिल्लो ३ अर्थात् चालु आर्थिक वर्षका शुरुवाती ३ महिनामा कनेक्ट आईपीएसमार्फत हुने कारोबार रकम र सङ्ख्या दुवै बढदो प्रवृत्तिमा गएको देखिन्छ।