प्रयोगकर्ताको डाटा संकलन गरेको आरोपमा कोरियामा मेटामाथि १५ मिलियन डलर जरिवाना

काठमाडौं ।

दक्षिण कोरियाले फेसबुकको मालिक मेटा प्लेटफर्म्सलाई २१.६२ अर्ब वन (१५.६७ मिलियन डलर) जरिवाना तिर्न आदेश दिएको छ। मेटाले प्रयोगकर्ताको संवेदनशील डाटा संकलन गरी विज्ञापनदाताहरूलाई कानूनी आधारबिना दिएको पाइएको अभियोगमा यस्तो जरिवाना गरिएको सियोलको डाटा संरक्षण निकायले बताएको छ।

जीएसएमएरिनाका अनुसार अमेरिकी प्रविधि दिग्गजले करिब ९८०,००० दक्षिण कोरियाली फेसबुक प्रयोगकर्ताहरूको धर्म, राजनीतिक विचारधारा र यौन झुकावजस्ता विषयहरूको जानकारी प्रयोगकर्ताहरूको सहमति नलिई प्राप्त गरेको, व्यक्तिगत जानकारी संरक्षण आयोगले मंगलबार एक विज्ञप्तिमा जनाएको छ।

एजेन्सीका अनुसार उक्त जानकारी करिब ४,००० विज्ञापनदाताहरूले प्रयोग गरेका थिए। मेटा कोरियाका एक अधिकारीले यसबारे टिप्पणी गर्न अस्वीकार गरेको जीएसएमएरिनाले उल्लेख गरेको छ।

“विशेष रूपमा (मेटाले) प्रयोगकर्ताहरूले फेसबुकमा मन पराएका पेजहरू र क्लिक गरेका विज्ञापनहरूजस्ता व्यवहार सम्बन्धी डाटा विश्लेषण गरेको र संवेदनशील जानकारीसँग सम्बन्धित विज्ञापन थिमहरू सिर्जना र व्यवस्थापन गरेको पाइएको छ,” आयोगले भन्यो।

यसबाहेक यसमा प्रयोगकर्ताहरूलाई उदाहरणका लागि उत्तर कोरियाली शरणार्थी, कुनै विशेष धर्मको अनुयायी, वा ट्रान्सजेन्डर वा समलिंगीको रूपमा वर्गीकृत गरिएको पाइएको निकायको भनाई छ।

मेटाले प्रयोगकर्ताहरूले व्यक्तिगत जानकारी पहुँच गर्न गरेको अनुरोधलाई अन्यायपूर्ण रूपमा अस्वीकार गरेको र करिब १० जना दक्षिण कोरियालीहरूको डाटा ह्याकरहरूले चुहिनबाट रोक्न असफल भएको पनि आयोगले जनाएको छ।