आईफोनको आयातकर्ता जेनेरेशन नेक्स्टको व्यापार बढ्दोक्रममा, ४ अर्ब ३२ करोड रुपैयाँको कारोबार

काठमाडौं ।

नेपालमा आईफोन आयात तथा बिक्री गर्दै आएको जेनेरेशन नेक्स्ट कम्युनिकेशन प्रालिको आम्दानी बढिरहेको देखिएको छ। कम्पनीले २०८०/८१ मा ४ अर्ब ३२ करोड रुपैयाँको अपरिष्कृत कारोबार गरेको देखिएको छ।

इन्फोमेरिक्स क्रेडिट रेटिङ नेपाल लिमिटेडले कम्पनीलाई अल्पकालीन बैंक सुविधाहरूको लागि ‘ कम्पनीलाई एफोर प्लसको रेटिङ्ग दिएको छ। सोही प्रतिवेदनअनुसार आईफोनको बिक्री बढिरहँदा कम्पनीले आर्थिक वर्ष २०८०/८१ मा ४ अर्ब ३२ करोड रुपैयाँको कारोबार गरेको हो।

कम्पनीले गरेको आम्दानी अघिल्लो वर्षको तुलनामा २ अर्ब ११ करोड रुपैयाँले बढी हो।

यसअघि जेनेरेशन नेक्स्टको कुल सञ्चालन आम्दानी आर्थिक वर्ष २०७९/८० मा ३ अर्ब ५७ करोड १० लाखबाट घटेर २ अर्ब २१ करोड ८० लाख रुपैयाँमा झरेको थियो। यसको कारण ३ हजार डलरभन्दा महँगो स्मार्टफोनको आयातमा प्रतिबन्ध थियो।

प्रतिबन्ध हटेपछि आर्थिक वर्ष २०८०/८१ मा ४ अर्ब ३२ करोड ९० लाखको कुल सञ्चालन आम्दानी प्राप्त गर्न सक्षम भएको छ। आर्थिक वर्ष २०८०/८१ मा कम्पनीको ईबीआईडीटीए मार्जिन ५.२१% र शुद्ध नाफा मार्जिन २.३२ % रहेको थियो।

सन् २०२३/२४ मा एप्पलको बिक्री ९६ प्रतिशतले बढेको छ। अघिल्लो वर्ष यस्तो बिक्री ५७ प्रतिशत मात्रै थियो।

प्रबन्ध निर्देशक पवनकुमार भिमसरिया रहेको कम्पनीले १ अर्ब ८६ करोड रुपैयाँको अल्पकालीन कर्जाका लागि रेटिङ पुनः पुष्टि गराएको छ।