खर्च घटाउने प्रस्ताव बोर्डसमक्ष लैजाँदै इन्टेलका सीईओ

काठमाडौं ।

इन्टेलका सीईओ प्याट गेल्सिंगर र प्रमुख कार्यकारीहरूले यो महिनाको अन्त्यमा कम्पनीको निर्देशक बोर्डलाई अनावश्यक व्यापारहरू छुट्याउन र पूँजी खर्चलाई पुनर्संगठित गर्ने योजना प्रस्तुत गर्ने अपेक्षा गरिएको छ।

कम्पनीकै एउटाा स्रोतका अनुसार कुनै समय विश्वमा प्रभुत्व जमाएको यो चिप निर्माता कम्पनीको स्थिति सुधार्ने प्रयास स्वरुप उक्त प्रस्ताव लैजान लागिएको हो।

अन्तर्राष्ट्रिय समाचार संस्था रोयटर्सका अनुसार यो योजनामा समग्र खर्च कसरी घटाउने भन्ने बारेका विचारहरू् समावेश हुनेछ। यसमा कम्पनीले आफ्नो यसअघिको ठूलो नाफाबाट रकम लगानी गर्न नसक्ने प्रोग्रामेबल चिप यूनिट अल्टेरालगायतका व्यवसाय बेचेर खर्च घटाउने विचार पनि समावेश हुनेछ।

उक्त स्रोतका अनुसार गेल्सिंगर र अन्य उच्च-पदस्थ कार्यकारीहरूले यो योजना सेप्टेम्बरको मध्यमा बोर्ड बैठकमा प्रस्तुत गर्ने अपेक्षा गरिएको छ। यो प्रस्तावमा तत्काल इन्टेललाई टुक्र्याउने वा ताइवानको कन्ट्र्याक्ट उत्पादन गर्ने फाउण्ड्री कम्पनी टीएसएमसीलगायतलाई बेच्ने कुरा समवेश छैन। इन्टेलले यसमा तत्काल कुनै प्रतिक्रिया नदिएको समाचारमा उल्लेख छ।

कम्पनीको उत्पादन सञ्चालनसम्बन्धी योजनाहरू पनि समावेश रहेको यो प्रस्तावलाई अझै अन्तिम रूप दिइएको छैन र बैठकअघि परिवर्तन हुन सक्ने जनाइएको छ।

इन्टेलले आफ्नो फाउन्ड्री व्यापारलाई यसको डिजाइन व्यापारबाट अलग गरिसकेको छ र यस वर्षको पहिलो त्रैमासिकदेखि आफ्ना वित्तीय परिणामहरू छुट्टाछुट्टै रिपोर्ट गर्दै आएको छ।

डिजाइन विभागका सम्भावित ग्राहकहरूलाई इन्टेलका कारखानाहरू (फ्याबहरू) प्रयोग गरेर चिप्स उत्पादन गर्ने ग्राहकहरूको प्रविधि गोप्य जानकारीमा पहुँच नहोस् भनेर कम्पनीले डिजाइन र उत्पादन व्यवसायहरू बीचमा एउटा छेकबार लगाएको छ।

इन्टेल अहिले आफ्नो सबैभन्दा खराब अवस्थाबाट गुज्रिरहेको छ। किनकि यो एआई युगमा एनभिडिया जस्ता प्रमुख एआई चिप निर्मातासँग प्रतिस्पर्धा गर्न प्रयास गरिरहेको छ।

एनभिडियाको बजार पुँजीकरण ३ ट्रिलियन डलर रहेको छ भने इन्टेलको बजार पुँजीकरण गत अगस्टमा दोस्रो त्रैमासिकको खराब आय रिपोर्टपछि १०० अर्ब डलरभन्दा तल झरेको छ।

गेल्सिंगरको टोलीले प्रस्तुत गर्ने प्रस्तावमा कम्पनीको कारखाना विस्तारमा पूँजी खर्च अझ घटाउने योजना पनि समावेश हुने सम्भावना छ। स्रोतका अनुसार यसमा जर्मनीमा रहेको ३२ अर्ब डलरको कारखानाको निर्माण कार्यलाई रोक्न वा पूरै बन्द गर्ने योजना पनि हुन सक्छ जुन परियोजना ढिलो भइरहेको बताइएको छ।