छिमेकी देश भारतमा १२ करोड भारुको १६०० आईफोन ट्रकबाटै चोरी

Technology Khabar १७ भाद्र २०८१, सोमबार

काठमाडौं ।

आईफोनहरू भारतमा उपलब्ध सबैभन्दा महँगो स्मार्टफोनहरू मध्ये एक हो। एप्पल आईफोन १५ सिरिज कम्पनीको सबैभन्दा महँगो स्मार्टफोन सिरिज हो। यसैको फाइदा चोरहरुले पनि उठाइरहेका छन्।

भारतको मध्य प्रदेशमा एउटा अचम्मको घटना बाहिर आएको छ। यहाँ भारु १२ करोडको आईफोन चोरी भएको खबर छ। प्रहरीका अनुसार चोरी भएका आइफोनको संख्या १६ सयभन्दा बढी रहेको छ।

मध्य प्रदेशको सागर जिल्लामा आइफोन चोरीको एउटा ठूलो घटना बाहिर आएको हो। एक ट्रकबाट १६ सयभन्दा बढी आईफोन चोरी भएको थियो, जसको मूल्य करिब १२ करोड रुपैयाँ रहेको बताइएको छ। मध्यप्रदेशको सागर जिल्ला प्रहरीका अनुसार प्रारम्भिक अनुसन्धानका आधारमा उक्त घटनामा ट्रकसँगै आएका सुरक्षा गार्डको संलग्नता हुन सक्ने अनुमान गरिएको छ। रिपोर्टका अनुसार आइफोन बोकेको ट्रक हरियाणाबाट चेन्नईको लामो बाटोमा थियो।

मध्य प्रदेशको सागर जोनका प्रहरी महानिरीक्षक प्रमोद वर्माले एएनआईलाई १२ करोड रुपैयाँ मूल्यका १६०० आईफोन लुटिएको जानकारी प्राप्त भएको बताएका छन्। यसमा सुरक्षा गार्ड नै दोषी रहेको बताइएको छ। यसका लागि विभागले टोली गठन गरेको र यस विषयमा गहिरो अनुसन्धान भइरहेको प्रहरी महानिरीक्षकले बताएका छन्।

उनले भनेअनुसार, कन्टेनर हरियाणाको गुरुग्रामबाट चेन्नई तर्फ गइरहेको थियो। गार्डले आफ्ना केही सहकर्मीलाई बोलाएर चालकलाई हातपात गर्दै  आईफोन लुटेको आरोप छ। यद्यपी यस सम्बन्धमा प्रहरीले अनुसन्धान गरिरहेको र यस सम्बन्धमा थप विवरण आउन बाँकी छ।

प्रकाशित: १७ भाद्र २०८१, सोमबार

तपाइको प्रतिक्रिया