अडीको इलेक्ट्रिक कारले सन् २०२३ मा ग्लोबल ईभी बिक्री रेकर्ड बनायो

काठमाडौं ।

द्रुत रूपमा बढ्दै गइरहेको अटोमोटिभ उद्योगमा अडीले इलेक्ट्रिक भेहिकल (ईभी) बिक्रीमा प्राप्त गरेको हालैको सफलता उल्लेखनीय भएको छ।

सन् २०२३ मा प्रतिष्ठित कार निर्माताको ईभी बिक्रीमा ५१ प्रतिशतको उल्लेखनीय वृद्धि भएको र विश्वव्यापी रूपमा १ लाख ७८ हजार एकाइहरू पुगेको जनाइएको छ।

साथै यो वृद्धिले वातावरणमैत्री यातायात विकल्पहरूतर्फ बढ्दो उपभोक्ता परिवर्तन र विद्युतीकरणप्रति अडीको प्रतिबद्धतालाई प्रतिबिम्बित गरेको छ।

अडीको सफलताको केन्द्रबिन्दु यसको लोकप्रिय इलेक्ट्रिक मोडलहरू क्यु४ ई–ट्रोन र क्यु८ ई–ट्रोन भएको जनाइएको छ। यी सवारीसाधनहरुले वातावरणमैत्रीसँग विलासितालाई सन्तुलनमा राख्दै बजारको ध्यान खिचेको छ।

त्यसका साथै फक्सवागन समूहको न्यू प्रिमियम प्लेटफर्म इलेक्ट्रिक (पीपीई) मा आधारित क्यु६ ई–ट्रोनको सन् २०२४ मा हुने आगामी लन्चको लागि उत्सुकतापूर्वक प्रतिक्षा गरिएको छ।

सन् २०२३ को चौथो त्रैमासिकमा अडीले लगभग ५५,४०० इलेक्ट्रिक कारहरू बिक्री गरेर प्रभावशाली उपलब्धि हासिल गरेको छ। साथै अघिल्लो वर्षको तुलनामा यो ३४ प्रतिशतले वृद्धि भएको र अडीको कुल बिक्री मात्राको लगभग ११ प्रतिशत इलेक्ट्रिक भेहिकलले ओगटेको जनाइएको छ।

चाखलाग्दो कुरा के छ भने, सन् २०२३ को अन्तिम त्रैमासिकमा ७४ प्रतिशत वृद्धिको साथ संयुक्त राज्य अमेरिकामा अडीको इलेक्ट्रिक कारको बिक्रीमा पनि उल्लेख्य वृद्धि भएको छ।

सन् २०२६ सम्ममा अल–इलेक्ट्रिक कारहरू मात्र ल्याउने आफ्नो लक्ष्यसँग पङ्क्तिबद्ध गर्दै विगत केही वर्षदेखि इलेक्ट्रिफिकेसन तर्फ अडीको यात्रा स्थिर रहेको छ। साथै दिगोपन र नवप्रवर्तन प्रतिको यो प्रतिबद्धताले हरियाली भविष्यको चुनौती र मागहरू पूरा गर्न तयार रहेको अडीलाई ईभी बजारमा अग्रणी स्थानमा राखेको गीज्मोचाइनाले उल्लेख गरेको छ।