काठमाडौं ।
छिमेकी भारतमा ट्याब्लेट बजार दोस्रो त्रैमासमा २९ प्रतिशतले बढेको साइबरमिडिया रिसर्चद्वारा साझा गरिएको तथ्याङ्कले देखाएको छ।
तथ्यांकअनुसार भारतको ट्याब्लेट बजार दोस्रो त्रैमासिकमा (क्वाटर–अन–क्वाटर आधारमा) अर्थात् अप्रिलदेखि जुनसम्मको अवधिमा २९ प्रतिशतले वृद्धि भएको हो। यद्यपी, ढुवानी तर्फ भने गत वर्षको सोही अवधिको तुलनामा २२ प्रतिशतले वार्षिक आधारमा गिरावट आएको उल्लेख छ।
एप्पलले २५.३८ प्रतिशत बजार हिस्सा (मार्केट सेयर) का साथ देशको बजारको नेतृत्व गरेको जनाइएको छ। यसको दक्षिण कोरियाली प्रतिद्वन्द्वी सामसङ २५.३१ प्रतिशत बजार हिस्साका साथ दोस्रो स्थानमा रहेको छ भने २३ प्रतिशत बजार हिस्साका साथ लेनोभो तेस्रो स्थान रहेको उल्लेख छ।
पछिल्ला केही वर्षहरूमा शाओमी, रियलमी, वानप्लस, ओप्पो आदि लगायत धेरै स्मार्टफोन ब्रान्डहरू पनि ट्याब्लेट श्रेणीमा प्रवेश गरेका छन्।
ट्याब्लेटको बढ्दो मागको श्रेय मुख्यतया मनोरञ्जन आवश्यकताहरू, शिक्षामा उपयोग र स्वास्थ्य सेवा जस्ता विशिष्ट क्षेत्रगत आवश्यकताहरूलाई दिइएको छ। यसै क्रममा, साइबरमिडिया रिसर्चले भारतमा वर्षको दोस्रो त्रैमासिकमा ट्याब्लेट बजारको प्रदर्शनको तथ्याङ्क साझा गरिएको हो।
भारतीय बजारमा एप्पलको नेतृत्वको श्रेय आईप्याड ९ र आईप्याड १० सिरिजलाई जाने उल्लेख छ भने आईप्याड ९ र आईप्याड १० को क्रमशः ४२ र २२ प्रतिशत बजार हिस्सा रहेको जनाइएको छ।
सामसङको ग्यालेक्सी ट्याब ए८ र ट्याब ए७ लाइटको वाईफाई र ४ जी भेरियन्टको विभिन्न मूल्य दायराहरूमा राम्रो बजार हिस्सा रहेको उल्लेख छ।
लेनोभो ब्रान्डको ट्याब एम१० एचडी (सेकेण्ड जेन वाईफाई) र ट्याब एम८ एचडी वाईफाई हरु भ्यालु–फर–मनी ट्याब्लेट सेगमेन्ट तर्फ सफल भएका थिए।
रियलमीको ट्याब ढुवानीमा आधा भन्दा बढीले गिरावट आएको र कम्पनीले ८ प्रतिशत बजार हिस्सा दर्ता गरेको छ।
यसैबीच, कम्पनीको ढुवानीमा पूरै १५५ प्रतिशतले वृद्धि हुँदा शाओमीको बजार हिस्सा ६ प्रतिशत पुगेको जनाइएको छ। उक्त वृद्धि शाओमी प्याड ५, प्याड ६ र रेडमी प्याडको कारणले हुन सक्ने अनुमान गरिएको छ।
यसबाहेक, वाईफाई ट्याब्लेट्सको ढुवानीमा १२ प्रतिशतले वृद्धि भएको र फाइभजी ट्याब्लेटको ढुवानी वार्षिक आधारमा ७ प्रतिशतले बढेको प्रतिवेदनले थप उल्लेख गरेको छ। साथै प्रिमियम ट्याब्लेट तर्फ पनि उल्लेखनीय ४८ प्रतिशत त्रैमासिक वृद्धि भएको जनाइएको छ।
डिस्प्लेको साइज १० इन्चभन्दा बढी भएका ट्याब्लेटहरू भारतीय उपभोक्ताहरूमा मन पराइएको गीज्मोचाइनाको रिपोर्टमा उल्लेख गरिएको छ।
प्रकाशित: ८ भाद्र २०८०, शुक्रबार
