काठमाडौं ।
चिनियाँ स्मार्टफोन कम्पनी शाओमीले भारतमा प्रवर्तन निदेशालय (ईडी) द्वारा करिब ६८२ मिलियन डलर सम्पत्ति जफत गर्ने कारबाहीबाट निराश भएको बताएको छ। कम्पनीले आफ्नो सम्पत्ति र हितको रक्षा गर्न जारी राख्ने बताएको छ।
शाओमीले जफत गरिएका सम्पत्तिमध्ये ८४ प्रतिशतभन्दा बढी अमेरिकी चिपसेट कम्पनी क्वालकमलाई रोयल्टी भुक्तानी गरेको बताएको भारतीय मिडियाहरुले जनाएका छन्।
यस सम्बन्धमा शाओमीले एक विज्ञप्तिमा भन्यो, “हामी कम्पनी र हाम्रा सरोकारवालाहरूको प्रतिष्ठा र हितको रक्षा गर्न सबै उपायहरू प्रयोग गर्नेछौं।” कम्पनीले भारतमा आफ्नो इकाई शाओमी समूहको सहायक कम्पनी भएको बताएको छ, जसले क्वालकमको बौद्धिक सम्पत्ति (आईपी) लाइसेन्सको उपयोग स्मार्टफोन निर्माणको लागि कानूनी सम्झौता गरेको छ। विज्ञप्तिमा भनिएअनुसार शाओमीले भारतीय एकाइले रोयल्टी भुक्तानीको लागि क्वालकमसँग मान्य व्यावसायिक सम्झौता गरेको छ।
तर, यस सम्बन्धमा देशको सक्षम अधिकारीले रोयल्टी भुक्तानी भनेको देश बाहिर विदेशी मुद्रा हस्तान्तरण गर्ने माध्यम मात्र भएको र यो फेमाको व्यवस्थाको घोर उल्लङ्घन भएको बताएका छन्।
भारतीय ईडीले देशमा जफत गरिएको सबैभन्दा ठूलो रकम भएको बताएको थियो। ईडीले करिब चार महिना अघि फेमाअन्तर्गत जफत आदेश जारी गरेको थियो र त्यसपछि स्वीकृतिको लागि सक्षम अधिकारीलाई पठाएको थियो।
यो आदेश फेमाको धारा ३७ए अन्तर्गत देशमा शाओमीको एकाइ विरुद्ध जारी गरिएको थियो। यस सम्बन्धमा, अधिकारीले ५,५५१.२७ करोड रुपैयाँ जफत गरेको पुष्टि गरेको छ र भनेको छ, “ईडीको अनुसन्धानले यो कुरा सही फेला परेको छ र कम्पनीले यो रकम देश बाहिर अनाधिकृत रूपमा स्थानान्तरण गरेको थियो।”
एमआई ब्राण्डका स्मार्टफोन बेच्ने शाओमीको देशको स्मार्टफोन बजारमा करिब १८ प्रतिशत हिस्सा छ। करिब दुई वर्षअघि भारत र चीनबीचको सीमा तनावपछि धेरै चिनियाँ कम्पनीलाई भारतमा व्यापार गर्न कठिनाइ भएको छ।
प्रकाशित: १९ आश्विन २०७९, बुधबार
