काठमाडौं ।
भारतको बेंगलुरुमा आधारित स्वास्थ्य प्रविधि स्टार्टअप अल्ट्राह्युमनले संयुक्त अरब इमिरेट्स (यूएई) भरका मानिसलाई जैविक उमेर मापन गर्ने मोडेल उपलब्ध गराउने उद्देश्यले अबुधाबीका स्वास्थ्य अधिकारीहरूसँग साझेदारी गरेको छ। अल्ट्राह्युमन स्मार्ट रिङका लागि परिचित छ।
सोमबार अल्ट्राह्युमनले अबुधाबी पब्लिक हेल्थ सेन्टर (एडीपीएचसी) सँग दुई वर्षे समझदारीपत्रमा हस्ताक्षर गरेको घोषणा गरेको छ। यस साझेदारीअन्तर्गत क्लिनिकल बायोमार्कर र पहिरनयोग्य उपकरणबाट प्राप्त तथ्यांकलाई संयोजन गरी जैविक उमेर मापन गर्ने मोडेल विकास र प्रमाणीकरण गरिनेछ।
यस मोडेलले व्यक्तिको उमेर बढ्ने गति अनुमान गर्न र निद्रा, शारीरिक गतिविधि, मुटुसम्बन्धी स्वास्थ्य तथा शरीरको चयापचयलगायतका पक्षले उमेर बढ्ने प्रक्रियालाई तीव्र वा सुस्त बनाउन कस्तो भूमिका खेल्छन् भन्ने पहिचान गर्न मद्दत गर्ने लक्ष्य राखिएको छ।
टेकक्रञ्चका अनुसार यो साझेदारी अल्ट्राह्युमनले पहिरनयोग्य उपकरण बिक्री गर्ने व्यवसायभन्दा बाहिर आफ्नो सेवा विस्तार गर्न थालेको पछिल्लो प्रयास हो। कम्पनीले आफ्ना स्वास्थ्यसम्बन्धी एल्गोरिदमलाई ठूलो जनसंख्यामा प्रयोग गर्ने लक्ष्य राखेको छ।
प्रमुख कार्यकारी अधिकृत मोहित कुमारका अनुसार कम्पनीले आफूलाई स्वास्थ्यसम्बन्धी तथ्यांकमा केन्द्रित कम्पनीका रूपमा हेर्न थालेको छ। स्मार्ट रिङ शरीरबाट तथ्यांक संकलन गर्ने एउटा माध्यम हो, जसको प्रयोग उमेर बढ्ने प्रक्रिया, दीर्घायु र स्वास्थ्यका अन्य क्षेत्रमा उपयोगी एल्गोरिदम विकास गर्न सकिन्छ।
“अल्ट्राह्युमनलाई कम्पनीका रूपमा हेर्दा हामीसँग स्पष्ट रूपमा अल्ट्राह्युमन रिङ छ, जुन मानव शरीरबाट तथ्यांक संकलन गर्ने माध्यम हो,” कुमारले टेकक्रन्चसँगको अन्तर्वार्तामा भने, “तर हाम्रो वास्तविक चासो रिङजस्तो उपकरणको स्वरूपमा मात्र होइन, यसबाट प्राप्त तथ्यांकलाई कसरी प्रयोग गर्ने भन्नेमा छ।”
सरकारसँग काम गर्दा आफ्ना ग्राहकमा सीमित नरही धेरै ठूलो जनसंख्यामा एल्गोरिदम प्रयोग गर्ने अवसर प्राप्त हुने कुमारले बताए। कम्पनीका अनुसार अहिलेसम्म अल्ट्राह्युमनले विश्वभर करिब आठ लाख स्मार्ट रिङ बिक्री गरिसकेको छ।
अबुधाबीसँगको साझेदारी राष्ट्रिय स्तरमा स्वास्थ्यसम्बन्धी एल्गोरिदम प्रयोग गर्ने कम्पनीको पहिलो कदम हो। अन्ततः स्वास्थ्य उमेर मापन गर्ने मोडेल यूएईभरका मानिसका लागि उपलब्ध गराउने लक्ष्य राखिएको छ।
स्मार्ट रिङका लागि परिचित भए पनि जैविक उमेर मापन गर्ने मोडेल कुनै एउटा प्रकारको पहिरनयोग्य उपकरणमा निर्भर नहुने गरी विकास भइरहेको कुमारले बताए।
यसमा रिङ, नाडीमा लगाइने उपकरण, शरीरमा बाँधिने स्ट्र्याप र छालामा टाँसिने प्याचबाट प्राप्त तथ्यांकसँगै क्लिनिकल बायोमार्कर पनि प्रयोग गर्न सकिनेछ। कम्पनीका अनुसार मानिसले भविष्यमा सरकारी डिजिटल स्वास्थ्य प्लेटफर्म ट्याम (टीएएमएम) र सहत्नामार्फत आफ्नो स्वास्थ्य उमेरबारे जानकारी प्राप्त गर्न सक्नेछन्।
अल्ट्राह्युमन र एडीपीएचसीले आगामी दुई वर्ष मोडेलको अनुसन्धान र क्लिनिकल प्रमाणीकरणमा काम गर्नेछन्। टेकक्रन्चसँग कुरा गर्दै कुमारले यो सेवा विभिन्न चरणमा विस्तार गरिने बताए। तर, उनले यसको विस्तृत समयतालिका भने सार्वजनिक गरेनन्।
प्रकाशित: २८ आश्विन २०८३, बुधबार
