काठमाडौं ।
चीनको ह्वावे टेक्नोलोजिजले बुधबार अमेरिकी कम्पनी एचपी इंकसँग वाइफाइ प्रविधिमा प्रयोग हुने पेटेन्टसम्बन्धी बहुवर्षीय क्रस-लाइसेन्स सम्झौता भएको जनाएको छ। यसमा पछिल्लो वाइफाइ ७ मापदण्ड पनि समावेश छ।
सम्झौताअनुसार एचपीले ह्वावेका पेटेन्ट प्रयोग गर्न पाउनेछ भने ह्वावेले एचपीका पेटेन्ट प्रयोग गर्न पाउनेछ। तर दुवै कम्पनीले सम्झौताको आर्थिक विवरण सार्वजनिक गरेका छैनन्। एचपीबाट ह्वावेले पाउने पेटेन्टको दायराबारे पनि ह्वावेले विस्तृत जानकारी दिएको छैन।
एचपीले यो सम्झौता उद्योगभर व्यापक रूपमा प्रयोग हुने प्रविधिका लागि गरिएको सामान्य लाइसेन्स सम्झौता भएको बताएको छ। यो चिनियाँ प्रविधि कम्पनीसँगको ठूलो व्यावसायिक सम्बन्धको सुरुवात नभएको एचपीले जनाएको छ।
“यो वाइफाइ प्रविधिसँग सम्बन्धित मानकका लागि आवश्यक पेटेन्टको लाइसेन्स हो,” एचपीका प्रवक्ताले भने। “यो नयाँ होइन र ह्वावेसँगको कुनै व्यापक रणनीतिक वा व्यावसायिक सम्बन्ध, साझेदारी वा सहकार्यलाई जनाउँदैन।”
मानकका लागि आवश्यक पेटेन्टले वाइफाइजस्ता उद्योगका मापदण्डअनुसार उत्पादनलाई एकअर्कासँग मिल्ने बनाउन कम्पनीहरूले प्रयोग गर्नुपर्ने आविष्कारलाई समेट्छ। कम्प्युटर, प्रिन्टर, फोन र वायरलेस नेटवर्कमा जोडिने अन्य उपकरण निर्माता कम्पनीहरूका लागि यस्ता लाइसेन्स सामान्य छन्।
रोयटर्सका अनुसार अमेरिकाले अमेरिकी नेटवर्कबाट ह्वावेका उपकरण हटाउन सञ्चार कम्पनीहरूलाई निर्देशन दिने प्रतिबन्ध लगाए पनि यो सम्झौताले विश्वव्यापी वायरलेस मापदण्डमा प्रयोग हुने पेटेन्टको महत्वपूर्ण अधिकार ह्वावेसँग अझै रहेको देखाउँछ।
ह्वावे–एचपी सम्झौता कानुनी विवादपछि
ह्वावेले पछिल्ला वर्षमा आफ्नो पेटेन्ट पोर्टफोलियो र लाइसेन्स व्यवसाय विस्तार गरेको छ। कम्पनीले अमेजनलगायतका कम्पनीसँग पनि विवाद टुंग्याइसकेको छ। ह्वावेले अघिल्लो पुस्ताको वायरलेस मापदण्ड वाइफाइ ६ कार्यान्वयनका लागि आवश्यक पेटेन्ट राख्ने प्रमुख कम्पनीमध्ये आफू पनि रहेको बताउँदै आएको छ।
ह्वावेले आफ्नो वाइफाइ ६ प्रविधि प्रयोग गर्ने प्रत्येक उपभोक्ता उपकरणका लागि ५० सेन्ट शुल्क तोकेको छ। सन् २०२५ को अन्त्यसम्म मोबाइल फोनबाहेक १.६ अर्बभन्दा बढी उपभोक्ता इलेक्ट्रोनिक उपकरणमा वाइफाइसँग सम्बन्धित ह्वावेका आविष्कार प्रयोग भएको कम्पनीले जनाएको छ।
बुधबार भएको सम्झौता ह्वावेले अगस्ट २०२५ मा युरोपको युनिफाइड पेटेन्ट कोर्टमा एचपीविरुद्ध दायर गरेको मुद्दापछि भएको हो। बौद्धिक सम्पत्ति प्रकाशन आईएएमका अनुसार ह्वावेले अमेरिकी कम्पनीले अनुमति नलिई वाइफाइ ६ को पेटेन्ट प्रयोग गरेको आरोप लगाएको थियो।
एचपीले नोभेम्बर २०२५ मा सिस्भेल वाइफाइ ६ पेटेन्ट पूलमा आबद्ध भएको थियो। यससँगै ह्वावे र फिलिप्सले एचपीविरुद्ध गरेका कानुनी कारबाही अन्त्य भएका थिए। उक्त पूलले एउटै सम्झौतामार्फत कम्पनीहरूलाई वाइफाइ ६ उत्पादनका लागि आवश्यक मानिने करिब २,००० पेटेन्टमा पहुँच दिन्छ।
ह्वावेले नयाँ प्रत्यक्ष सम्झौताले वाइफाइ ७ सहित आफ्ना वाइफाइसम्बन्धी पेटेन्टको अझ व्यापक समूह समेट्ने जनाएको छ।
अमेरिकाले सन् २०१९ देखि ह्वावेमाथि व्यापार प्रतिबन्ध लगाउँदै आएको छ। त्यस वर्ष वासिङ्टनले ह्वावेलाई व्यापार प्रतिबन्धको सूचीमा राखेको थियो। यसअनुसार अमेरिकी मूलको निश्चित प्रविधि उपलब्ध गराउन आपूर्तिकर्ताले सामान्यतया अमेरिकी सरकारको अनुमति लिनुपर्छ।
यी प्रतिबन्धले उन्नत सेमिकन्डक्टर र महत्वपूर्ण सफ्टवेयर खरिद गर्ने ह्वावेको क्षमतामा असर पारेको छ। तर यसले पेटेन्ट लाइसेन्ससम्बन्धी सम्झौतालाई स्वतः रोक्दैन।
क्यालिफोर्नियाको पालो अल्टोमा मुख्यालय रहेको एचपी विश्वको दोस्रो ठूलो पीसी निर्माता हो। गार्टनरको तथ्यांकअनुसार बजारमा एचपीको २१.३ प्रतिशत हिस्सा छ। पहिलो स्थानमा लेनोभो रहेको छ।
प्रकाशित: १२ भाद्र २०८३, शुक्रबार
