काठमाडौं ।
नेपालमा ब्याट्रीको प्रयोग तथा आयात बढ्दै गएको समयमा चीनका ब्याट्री निर्माता कम्पनीका प्रतिनिधि र नेपालभरका ब्याट्री आयातकर्ता तथा व्यवसायीबीच प्रत्यक्ष भेटघाट हुने भएको छ।
चीनबाट नेपालमा ब्याट्री तथा विद्युतीय सामग्रीको आयात बढिरहेको अवस्थामा नेपाली बजारको वास्तविक आवश्यकता, उपभोक्ताको माग, उत्पादनको गुणस्तर, मूल्य तथा आपूर्ति व्यवस्थापनबारे प्रत्यक्ष रूपमा बुझ्ने उद्देश्यले उक्त भेटघाट आयोजना गर्न लागिएको हो।
२३ अगस्टदेखि २६ अगस्ट २०२६ सम्म सञ्चालन हुने उक्त भेटघाटमा नेपालका विभिन्न जिल्लाबाट ब्याट्री आयात, थोक बिक्री, वितरण तथा विद्युतीय ऊर्जा क्षेत्रमा आबद्ध व्यवसायीहरू सहभागी हुने अपेक्षा गरिएको छ।
नेपालमा अहिले विद्युतीय सवारीसाधन, सौर्य ऊर्जा, इन्भर्टर, ऊर्जा भण्डारण प्रणाली, दूरसञ्चार, औद्योगिक उपकरण तथा अन्य विद्युतीय सामग्रीमा ब्याट्रीको प्रयोग विस्तार भइरहेको छ। यस्तो अवस्थामा नेपाली बजारमा आवश्यक पर्ने ब्याट्रीको प्रकार, क्षमता, गुणस्तर, मूल्य तथा प्रयोगको क्षेत्रबारे निर्माता कम्पनीलाई प्रत्यक्ष जानकारी गराउनु महत्वपूर्ण हुने व्यवसायीहरूको भनाइ छ।
नेपाली आयातकर्ता तथा व्यवसायीसँगको छलफलबाट कुन प्रकारका ब्याट्रीको माग बढी छ, कुन क्षमताका उत्पादन आवश्यक छन्, मूल्यको अवस्था कस्तो छ, गुणस्तरसम्बन्धी समस्या के–के छन् र भविष्यमा कुन प्रकारका ब्याट्रीको माग बढ्न सक्छ भन्ने विषयमा जानकारी सङ्कलन गरिने बताइएको छ।
यसबाट प्राप्त बजार जानकारीका आधारमा निर्माता कम्पनीले नेपाली बजारलाई लक्षित गरी उत्पादनको गुणस्तर, क्षमता, मूल्य, डिजाइन तथा आवश्यकता अनुसारको उत्पादन विकास गर्न सक्ने सम्भावना रहेको बताएको छ।
ब्याट्री व्यवसायमा उत्पादनको मूल्यसँगै विश्वसनीय आपूर्ति, गुणस्तरको निरन्तरता, समयमै ढुवानी तथा दीर्घकालीन आपूर्तिकर्तासँगको सम्बन्ध पनि महत्वपूर्ण हुन्छ।
त्यसैले चीनका निर्माता र नेपाली आयातकर्ताबीच प्रत्यक्ष सम्बन्ध स्थापना भएपछि भविष्यमा नियमित आपूर्ति, थोक खरिद, उत्पादनको अनुकूलन तथा दीर्घकालीन व्यावसायिक साझेदारीको सम्भावना बढ्ने अपेक्षा गरिएको छ।
नेपालमा ब्याट्रीको प्रयोग बढ्दै जाँदा आयात र बिक्रीसँगै प्रयोग भइसकेका ब्याट्रीको व्यवस्थापन पनि महत्वपूर्ण विषय बन्दै गएको छ।
हालै नेपालमा विद्युतीय सवारीका ब्याट्रीको पहिचान तथा ट्र्याकिङ प्रणाली, प्रयोगपछि ब्याट्री सङ्कलन, पुनःप्रयोग तथा पुनर्चक्रणका लागि स्पष्ट व्यवस्था आवश्यक रहेको विषयमा सरोकारवालाहरूले जोड दिएका छन्।
भविष्यको ब्याट्री व्यवसायलाई केवल आयात र बिक्रीमा सीमित नराखी उत्पादन, आपूर्ति, प्रयोग, सङ्कलन, पुनःप्रयोग र पुनर्चक्रणसम्मको सम्पूर्ण चक्र का रूपमा विकास गर्नुपर्ने आवश्यकता देखिएको छ।
चीन विश्वव्यापी ब्याट्री तथा स्वच्छ ऊर्जा प्रविधिको महत्वपूर्ण उत्पादन केन्द्रका रूपमा विकसित हुँदै आएको छ। नेपालमा पनि विद्युतीय सवारी, सौर्य ऊर्जा तथा ऊर्जा भण्डारण प्रणालीको प्रयोग विस्तार भइरहेका कारण आगामी दिनमा ब्याट्रीको बजार अझ विस्तार हुने सम्भावना छ।
प्रकाशित: ९ भाद्र २०८३, मंगलवार
