काठमाडौं ।
मेटाले मेटा एआईका लागि छुट्टै डेस्कटप एप सार्वजनिक गर्दैछ। नयाँ म्याक एप फेसबुक र इन्स्टाग्राममा निर्भर व्यवसाय सञ्चालक तथा क्रिएटरलाई एआई उपकरण उपलब्ध गराउने कम्पनीको पछिल्लो प्रयासको हिस्सा हो।
म्याक एपले मेटा एआईको हालको वेबसाइट र मोबाइल एपको तुलनामा केही नयाँ सुविधा ल्याएको छ। उदाहरणका लागि, प्रयोगकर्ताले आफ्नो स्क्रिनको केही भाग सेयर गर्न सक्नेछन्, जसले एआई असिस्टेन्टलाई उनीहरूले गरिरहेको काम ‘हेर्न’ र अझ सान्दर्भिक उत्तर दिन सक्षम बनाउनेछ। मेटाका अनुसार यो सुविधा विशेषगरी व्यवसायका लागि उपयोगी हुनेछ, जसबाट पोस्ट, विज्ञापन तथा अन्य सामग्री तयार गर्न सुझाव लिन सकिनेछ।
कम्पनीले मेटा एआईलाई व्यवसायका लागि उपयोगी थप सुविधामा पहुँच दिने भएको छ। यसमा आफ्नै एनालिटिक्स र विज्ञापन उपकरण पनि समावेश छन्। व्यावसायिक फेसबुक र इन्स्टाग्राम अकाउन्ट भएका प्रयोगकर्ताले अब मेटा एआईलाई गुगल वर्कस्पेससँग जोडेर आफ्ना कामसँग सम्बन्धित कागजात, स्प्रेडसिट तथा अन्य डेटा प्रयोग गर्न सक्ने इन्ग्याजेटले उल्लेख गरेको छ।
मेटाका अनुसार यी सुविधाले व्यवसायलाई विज्ञापन अभियान व्यवस्थापन गर्न र आफ्नै कम्पनीअनुसार तयार पारिएका सुझाव प्राप्त गर्न थप सहयोग गर्नेछन्। कम्पनीले आफ्नो ब्लग पोस्टमा भनेको छ, “तपाईंले आफ्नो व्यवसायबारे मेटा एआईलाई प्रश्न सोध्न सक्नुहुन्छ र अकाउन्टको संलग्नता तथा विज्ञापनको प्रदर्शनजस्ता मेटासँग मात्र उपलब्ध सन्दर्भका आधारमा उत्तर प्राप्त गर्न सक्नुहुन्छ। आफ्ना अकाउन्टबाहेक समान ब्रान्डका सार्वजनिक रूपमा उपलब्ध जानकारी तथा उनीहरूले मेटामा आफ्नो उपस्थिति कसरी बनाइरहेका छन् भन्नेबारे पनि जानकारी लिन सकिन्छ।”
यो अपडेट आफ्ना एप प्रयोग गरेर व्यवसाय सञ्चालन तथा मार्केटिङ गर्ने लाखौं मानिसलाई एआई उपकरण प्रयोग गर्न प्रोत्साहित गर्ने मेटाको पछिल्लो प्रयासको हिस्सा हो। कम्पनीले हालै प्रतिस्पर्धी उत्पादनभन्दा सस्तो एआई कोडिङ एजेन्ट पनि सार्वजनिक गरेको थियो। मेटाका प्रमुख मार्क जुकरबर्गले कम्पनीका एजेन्टले “तपाईंको सम्पूर्ण व्यवसाय सञ्चालन गर्न सक्ने” बनाउने आफ्नो लक्ष्य रहेको बताएका छन्।
यस कदमले मेटाका एआई सब्स्क्रिप्सन योजनातर्फ पनि थप प्रयोगकर्ता आकर्षित गर्न सक्छ। नयाँ म्याक एप निःशुल्क प्रयोग गर्न सकिने भए पनि मेटाले मेटा वन योजना आवश्यक पर्ने आफ्ना थप उन्नत एआई सुविधामा प्रयोग सीमाहरू बिस्तारै लागू गर्दै आएको छ।
प्रकाशित: ५ भाद्र २०८३, शुक्रबार
×
