काठमाडौं ।
चीनले पहिलो पटक रकेटको पहिलो चरण जमिनमै सफलतापूर्वक पुनःप्राप्त गरेको सरकारी सञ्चारमाध्यमले बुधबार जनाएको छ। चीनले आफ्नो अन्तरिक्ष कार्यक्रमलाई थप अघि बढाउने प्रयास गरिरहेका बेला यो सफलता हासिल भएको हो।
चीनले जमिनमा पहिलो पटक रकेट पुनःप्राप्त गरे पनि रकेटको चरण पुनःप्राप्त गरेको भने यो दोस्रो पटक हो। यसअघि जुलाईमा समुद्रमा रहेको प्लेटफर्मबाट रकेटको चरण सफलतापूर्वक पुनःप्राप्त गरिएको थियो।
एसोसियटेड प्रेसका अनुसार चिनियाँ सरकारी समाचार संस्था सिन्ह्वाका अनुसार पुनःप्रयोग गर्न मिल्ने झुक्वे–३ रकेट बुधबार बिहान प्रक्षेपण गरिएको थियो र त्यसपछि रकेटको पहिलो चरण पुनःप्राप्त गरिएको थियो।
एलन मस्कको स्पेसएक्स र जेफ बेजोसको ब्लु ओरिजिनले सन् २०१५ देखि रकेट पुनःप्राप्त गर्दै आएका छन्। यसले स्याटेलाइट तथा अन्य सामग्री अन्तरिक्षतर्फ पुर्याएपछि फालिने हार्डवेयरलाई पुनःप्रयोग गरेर प्रक्षेपण लागत घटाउन सहयोग गरेको छ।
सिन्ह्वाका अनुसार बुधबारको पुनःप्राप्ति चीनले पहिलो पटक तैनाथ गर्न मिल्ने ल्यान्डिङ लेग प्रयोग गरेको अवसर पनि हो। चीनले यसलाई “पुनःप्रयोग गर्न मिल्ने रकेट प्रविधिमा ठूलो उपलब्धि” भनेको छ।
जुलाई १० मा लङ मार्च–१०बी रकेटको पहिलो चरण प्रक्षेपणपछि दोस्रो चरणबाट अलग भएको थियो र समुद्रमा रहेको प्लेटफर्ममा फर्किएको थियो। त्यसबेला रकेटलाई जालीमार्फत समात्ने प्रणाली प्रयोग गरेर पुनःप्राप्त गरिएको थियो।
त्यसको भोलिपल्ट जुलाई ११ मा जापानले प्रयोगात्मक पुनःप्रयोग गर्न मिल्ने रकेटको पहिलो परीक्षण उडान गरेको थियो। उक्त रकेट प्रक्षेपणपछि सुरक्षित रूपमा अवतरण भएको थियो।
जापानले पनि प्रक्षेपण लागत घटाउन र विश्वव्यापी अन्तरिक्ष बजारमा प्रतिस्पर्धा गर्न आवश्यक प्रविधिमा अन्य देशसँगको दूरी कम गर्ने प्रयास गरिरहेको छ।
प्रकाशित: ४ भाद्र २०८३, बिहीबार
