चिनियाँ रकेट प्रक्षेपण असफल

काठमाडौं ।

सञ्चार उपग्रह बोकेको चिनियाँ लङ मार्च–७ए रकेट प्रक्षेपणका क्रममा असफल भएको छ। सरकारी समाचार संस्था सिन्ह्वाका अनुसार रकेटमा उडानका क्रममा ‘विसङ्गति’ देखिएपछि प्रक्षेपण असफल भएको हो। प्रत्यक्षदर्शीले खिचेको भिडियोमा रकेट आकाशमै विस्फोट भएको देखिएको छ।

चीनको दक्षिणी प्रान्त हाइनानस्थित वेन्चाङ अन्तरिक्ष प्रक्षेपण केन्द्रबाट सोमबार स्थानीय समयअनुसार राति ८ः०२ बजे रकेट प्रक्षेपण गरिएको थियो। रकेटले झोङ्जिङ–४बी सञ्चार उपग्रहलाई अन्तरिक्षमा स्थापित गर्ने लक्ष्य राखेको थियो।

सिन्ह्वाले रकेट उडानमा रहेकै बेला ‘विसङ्गति’ देखिएको जनाएको छ। असफलताको वास्तविक कारणबारे अनुसन्धान भइरहेको बताइएको छ।

सिङ्गापुरस्थित च्यानल न्युजएशियाले सामाजिक सञ्जाल इन्स्टाग्राममा रकेट विस्फोट भएको दृश्य सार्वजनिक गरेको छ। हाइनानबाट सञ्चालित एउटा सामाजिक सञ्जाल खातामा प्रक्षेपण भएको केही घण्टापछि सार्वजनिक गरिएको अर्को भिडियोमा रकेट उडेको करिब ८५ सेकेन्डपछि आकाशमा ठूलो आगोको गोला देखिएको छ। त्यसपछि भग्नावशेष जमिनतर्फ खस्दा आकाशमा बाक्लो धुवाँको बादल बनेको देखिन्छ।

पछिल्लो असफलताले चीनको तीव्र रूपमा अघि बढिरहेको अन्तरिक्ष कार्यक्रममाथि ध्यानाकर्षण भएको छ। चीनले राष्ट्रपति सी जिनपिङले अघि सार्नुभएको ‘अन्तरिक्ष सपना’ पूरा गर्ने उद्देश्यले पछिल्ला वर्षमा अन्तरिक्ष कार्यक्रमका लागि अर्बौं डलर लगानी गर्दै आएको छ।

यसैबीच, चीनले गत जुलाईमा पहिलोपटक पुनःप्रयोग गर्न मिल्ने रकेट सफलतापूर्वक अवतरण गराएको थियो। चिनियाँ अन्तरिक्ष निकायका अनुसार उक्त उपलब्धि अन्तरिक्ष कार्यक्रमको महत्वाकांक्षा पूरा गर्न र भविष्यमा प्रक्षेपण लागत घटाउन महत्त्वपूर्ण कदम हो।

चीनले सन् २०३० अघि चन्द्रमामा अन्तरिक्ष यात्री पठाउने लक्ष्य राखेको छ। यस अभियानमा चीनले संयुक्त राज्य अमेरिकाको आर्टेमिस कार्यक्रमसँग प्रतिस्पर्धा गरिरहेको छ।

स्पेसएक्सका प्रमुख कार्यकारी अधिकृत इलन मस्कले पनि सोमबारको चिनियाँ रकेट प्रक्षेपण असफलताबारे सामाजिक सञ्जाल एक्समा टिप्पणी गरेका छन्। उनले रकेट निर्माण तथा प्रक्षेपण अत्यन्त कठिन काम भएको उल्लेख गर्दै चिनियाँ पक्ष चाँडै असफलताबाट उभिने आशा व्यक्त गरेका छन्।

यसअघि स्पेसएक्सको रकेटको करिब चार टन तौलको एउटा टुक्रा गत बुधबार अनियन्त्रित रूपमा चन्द्रमामा खसेको अनुमान गरिएको थियो। उक्त वस्तु चन्द्रमाको सतहमा ठोक्किँदा एउटा क्रेटर बन्न सक्ने अपेक्षा गरिएको थियो।

चीनको लङ मार्च–७ए रकेटको प्रक्षेपण असफल भएको यो पहिलो घटना भने होइन। सन् २०२० मा वेन्चाङ केन्द्रबाट गरिएको यस रकेटको पहिलो प्रक्षेपण पनि उडानका क्रममा देखिएको प्राविधिक समस्यापछि असफल भएको सिन्ह्वाले त्यस वर्षको मार्चमा जनाएको थियो।

चीनले अन्तरिक्ष अनुसन्धान, मानवसहितको अन्तरिक्ष अभियान र चन्द्र अन्वेषणलाई आफ्नो दीर्घकालीन रणनीतिक प्राथमिकताका रूपमा अघि बढाउँदै आएको छ। पछिल्लो असफलताको कारण पहिचान भएपछि त्यसले आगामी प्रक्षेपणको सुरक्षा तथा विश्वसनीयता सुधारमा महत्त्वपूर्ण भूमिका खेल्ने अपेक्षा गरिएको छ।-रासस/एएफपी