काठमाडौं ।
अमेरिकी दूरसञ्चार कम्पनी एटीएन्डटीले दोस्रो त्रैमासिकमा फाइबर र ५जी सेवामा ग्राहक संख्या बढेपछि मजबुत वित्तीय नतिजा सार्वजनिक गरेको छ।
कम्पनीले जुनको अन्त्यसम्मको तीन महिनामा फाइबर ब्रोडब्यान्ड र फिक्स्ड वायरलेस सेवामा अहिलेसम्मकै उच्च ग्राहक थपिएको जनाएको छ। साथै, उपभोक्ता पोस्टपेड वायरलेस खातामा पछिल्ला तीन वर्षभन्दा बढी अवधिकै सबैभन्दा बलियो वृद्धि भएको बताएको छ।
टेलिकम्स डटकमका अनुसार यी सेवाहरूमा गरेर कुल १० लाखभन्दा बढी नयाँ ग्राहक थपिएका छन्।
यसमध्ये पोस्टपेड मोबाइल सेवामा ४ लाख ३२ हजार, फाइबर ब्रोडब्यान्डमा ३ लाख ६७ हजार र फिक्स्ड वायरलेस एक्सेस (एफडब्लुए) सेवामा २ लाख ७९ हजार नयाँ ग्राहक थपिएका छन्।
अमेरिकी दूरसञ्चार बजारमा पहिले पोस्टपेड मोबाइल ग्राहक थप्ने प्रतिस्पर्धा मुख्य विषय थियो। तर अहिले कम्पनीहरूले दीर्घकालीन ग्राहक मूल्य र एउटै ग्राहकलाई धेरै सेवा उपलब्ध गराएर टिकाइराख्नमा बढी ध्यान दिन थालेका छन्।
एटीएन्डटीले उच्च मूल्य भएका संयुक्त सेवा प्रयोग गर्ने ग्राहकको संख्या बढिरहेको जनाएको छ, तर वास्तविक संख्या भने सार्वजनिक गरेको छैन। कम्पनीका अनुसार फाइबर वा इन्टरनेट एयर (एफडब्लुए) सेवा प्रयोग गर्दै पोस्टपेड मोबाइल सेवा पनि लिने ग्राहकलाई संयुक्त सेवा ग्राहक मानिन्छ।
जुनको अन्त्यसम्म यस्ता ग्राहक कम्पनीको एडभान्स्ड होम इन्टरनेट ग्राहक आधारको ४२.५ प्रतिशत रहेका छन्। पहिलो त्रैमासिकमा यो अनुपात करिब ४५ प्रतिशत रहेको कम्पनीले जनाएको थियो।
एटीएन्डटीका प्रमुख कार्यकारी अधिकृत जोन स्ट्यान्कीले एडभान्स्ड कनेक्टिभिटी इन्टरनेट सेवामा कम्पनीले अहिलेसम्मकै उत्कृष्ट पहिलो छामाही ग्राहक वृद्धि हासिल गरेको बताए। उनका अनुसार कम्पनी फाइबर र फाइभजी सेवा एउटै प्रदायकमार्फत उपलब्ध गराउने अवस्थामा पुगेको छ।
स्ट्यान्कीले गत वर्ष नै ग्राहकलाई लामो समयसम्म टिकाइराख्न फाइबर सेवाको भूमिका महत्त्वपूर्ण रहेको र केवल वायरलेस प्रतिग्राहक आम्दानी (एआरपीयू) मा निर्भर नरहने रणनीति सार्वजनिक गरेका थिए। कम्पनीले एआरपीयूलाई प्रमुख रूपमा प्रस्तुत गरेको भने छैन।
पोस्टपेड मोबाइल सेवामा प्रतिग्राहक औसत आम्दानी ५८.०१ डलर पुगेको छ, जुन अघिल्लो वर्षको सोही अवधिको तुलनामा करिब १ डलर बढी हो।
यसको प्रभावस्वरूप एडभान्स्ड कनेक्टिभिटी डिभिजनको सेवा आम्दानी ५.१ प्रतिशत बढेर २३.५ अर्ब डलर पुगेको छ। कम्पनीका अनुसार वायरलेस र फाइबर दुवैले यो वृद्धि सम्भव बनाएका हुन्। फेब्रुअरीमा लुमेनको उपभोक्ता फाइबर व्यवसाय खरिद गरेको प्रभाव पनि यसमा परेको छ।
यस डिभिजनको समायोजित ईबिट्डा ८ प्रतिशत बढेर १२ अर्ब डलरभन्दा माथि पुगेको छ भने मार्जिन ४२ प्रतिशत पुगेको छ।
समूहस्तरमा एटीएन्डटीको कुल आम्दानी २.३ प्रतिशत बढेर ३१.६ अर्ब डलर पुगेको छ। पुराना सेवाबाट आएको आम्दानी घटे पनि कम्पनीले आफ्नो तामाको नेटवर्क हटाउँदै लगेका कारण यस्तो भएको जनाएको छ। मेक्सिकोमा भने विनिमय दर अनुकूल हुँदा आम्दानी बढेको छ।
समायोजित ईबिट्डा अघिल्लो वर्षको ११.७ अर्ब डलरबाट बढेर १२.३ अर्ब डलर पुगेको छ।
कम्पनीले यस वर्षका लागि आफ्नो वित्तीय प्रक्षेपण यथावत राखेको छ। यसमा सन् २०२६ मा ३ देखि ४ प्रतिशत ईबिट्डा वृद्धि र सन् २०२८ सम्म ५ प्रतिशत वा सोभन्दा बढी वृद्धि हुने अपेक्षा गरिएको छ।
कम्पनीले आगामी वर्षहरूमा सेवा आम्दानीमा सामान्य एकल अंकको वृद्धि हुने जनाएको छ। सन् २०२६ मा एडभान्स्ड कनेक्टिभिटी सेवाको आम्दानी ५ प्रतिशतभन्दा बढी बढ्ने अपेक्षा गरिएको छ भने पुराना सेवाबाट हुने आम्दानी २० प्रतिशतले घट्दै सन् २०२८ सम्म नगण्य स्तरमा पुग्ने अनुमान गरिएको छ।
एटीएन्डटीको रणनीति स्पष्ट देखिएको छ र हालसम्म कम्पनीले अपनाएको यो रणनीतिले सकारात्मक परिणाम दिएको संकेत गरेको छ।
प्रकाशित: ९ श्रावण २०८३, शनिबार
