एप्पलपछि एक्सबक्सले पनि बढायो गेमिङ कन्सोलको मूल्य

हार्डवेयर उत्पादनहरूको मूल्य वृद्धि घोषणा गरेको केही घण्टामै Microsoft ले पनि आफ्ना एक्सबक्स गेमिङ कन्सोलहरूको मूल्य बढाउने घोषणा गरेको छ। साथै कम्पनीले २ टेराबाइट क्षमताको मोडेल उत्पादन बन्द गर्ने जानकारी दिएको छ।

आगामी अगस्ट १ देखि विश्वभर एक्सबक्स कन्सोलको मूल्य बढ्नेछ। ५१२ जीबी मोडेलको मूल्य १०० अमेरिकी डलरले बढ्नेछ भने १ टेराबाइट संस्करणको मूल्य १५० अमेरिकी डलरसम्म बढाइने टेकक्रञ्चले उल्लेख गरेको छ।

नयाँ मूल्यसूचीअनुसार:

• एक्सबक्स सिरिज एस ५१२ जीबी को मूल्य ३९९ डलरबाट ४९९ डलर पुग्नेछ।
• एक्सबक्स सिरिज एस १ टीबी को मूल्य ४४९ डलरबाट ५९९ डलर पुग्नेछ।
• एक्सबक्स सिरिज एक्स १ टीबी डिजिटल को मूल्य ५९९ डलरबाट ७५० डलर पुग्नेछ।
• एक्सबक्स सिरिज एक्स १ टीबी डिस्कको मूल्य ६४९ डलरबाट ८०० डलर पुग्नेछ।

कम्पनीका अनुसार मेमोरी र स्टोरेज चिपको लागत तीव्र रूपमा बढेकाले मूल्य समायोजन गर्नुपरेको हो। हाल मेमोरी तथा स्टोरेजको लागत अघिल्लो स्तरको तुलनामा २.५ गुणाभन्दा बढी पुगेको माइक्रोसफ्टले जनाएको छ। कम्पनीले सन् २०२७ को शरद ऋतुसम्म यी लागत दोब्बर हुन सक्ने चेतावनी पनि दिएको छ। यो कदम माइक्रोसफ्टले गत वर्ष अक्टोबरमा अमेरिकामा एक्सबक्सको मूल्य बढाएको एक वर्ष नपुग्दै आएको हो।

यो घोषणा एप्पलले म्याक र आइप्याडलगायतका उत्पादनको मूल्य बढाउने निर्णय गरेलगत्तै आएको हो। एप्पलले पनि एआई पूर्वाधार र डाटा सेन्टरहरूको तीव्र मागका कारण मेमोरी तथा स्टोरेज चिपको मूल्य बढेको उल्लेख गरेको थियो।

लगातार आएका यी घोषणाहरूले एआई प्रविधिको विस्तारले दैनिक प्रयोगका इलेक्ट्रोनिक उपकरणको मूल्यमा कस्तो प्रभाव पारिरहेको छ भन्ने देखाएको छ। ठूला प्रविधि कम्पनीहरूले अझ शक्तिशाली एआई प्रणालीमा ठूलो लगानी गरिरहेकाले उन्नत मेमोरी र स्टोरेज चिपको माग बढेको छ, जसले आपूर्ति शृंखलामा दबाब सिर्जना गर्दै उद्योगभर लागत बढाइरहेको छ।

मूल्य वृद्धिको असर कम देखाउन माइक्रोसफ्टले किस्ताबन्दी भुक्तानी र कम मूल्यका हार्डवेयर उपलब्ध गराउने योजनाबारे पनि जानकारी दिएको छ। कम्पनीले प्रयोग भइसकेका कन्सोलहरू कम मूल्यमा उपलब्ध गराउन नयाँ कार्यक्रम ल्याउने तयारी गरिरहेको जनाएको छ।

माइक्रोसफ्ट स्टोरमार्फत योग्य एक्सबक्स हार्डवेयर खरिद गर्ने ग्राहकले “अहिले किन्नुहोस्, पछि तिर्नुहोस्” कार्यक्रमको सुविधा पाउनेछन्। त्यस्तै, अमेजनमार्फत खरिद गर्ने ग्राहकले निश्चित उत्पादनमा १२ महिनासम्म शून्य प्रतिशत ब्याजदरमा वित्तीय सुविधा प्राप्त गर्न सक्नेछन्।