काठमाडौं ।
बेलायतले गुगलको सर्च सेवामाथि नयाँ आचरणसम्बन्धी नियम लागू गरेको छ, जसअनुसार प्रकाशकहरूले आफ्नो सामग्री अमेरिकी प्रविधि कम्पनीका एआई सुविधालाई सञ्चालन गर्न प्रयोग हुन नदिने विकल्प पाउने भएका छन्।
बेलायतको प्रतिस्पर्धा तथा बजार नियामक (सीएमए) ले खोज बजारमा गुगलको प्रभुत्वबारे चिन्ता व्यक्त गर्दै कम्पनीलाई “स्ट्राटेजिक मार्केट स्टाटस” प्रदान गरेको छ। यसले नियामकलाई विश्वास र पारदर्शिता बढाउने उद्देश्यले कम्पनीका लागि लक्षित नियम लागू गर्न अनुमति दिन्छ।
बेलायतमा हुने ९० प्रतिशतभन्दा बढी खोज गुगलमार्फत हुने गरेको छ। नियामकले जनवरीमै प्रकाशकहरूलाई आफ्नो सामग्री कसरी प्रयोग हुन्छ भन्ने विषयमा बढी नियन्त्रण दिन चाहेको जनाएको थियो।
बुधबार सीएमएले डिजिटल बजार प्रतिस्पर्धा व्यवस्थाअन्तर्गत गुगलमाथि लगाइएका नयाँ आवश्यकताले प्रकाशकहरूलाई आफ्नो सामग्रीको प्रयोगबारे बढी नियन्त्रण र बलियो मोलमोलाइ क्षमता दिने तथा निष्पक्ष सम्झौता सुनिश्चित गर्ने रोयटर्सले जनाएको छ।
एआईको सहयोगमा तयार गरिएका खोज सारांशहरू प्रयोगकर्तामाझ लोकप्रिय बन्दै गएपछि समाचार वेबसाइट तथा अन्य प्रकाशकहरूको क्लिक दर उल्लेखनीय रूपमा घटेको छ।
गुगलले भने जेनेरेटिभ एआईमार्फत प्रयोगकर्ताले जानकारी खोज्ने र बुझ्ने तरिकामा आएको परिवर्तनअनुसार वेबसाइट सञ्चालकलाई नयाँ स्रोत, जानकारी र नियन्त्रणका सुविधा उपलब्ध गराइरहेको जनाएको छ।
कम्पनीले प्रकाशकलाई आफ्ना लिंक र सामग्री जेनेरेटिभ एआई खोज सुविधामा कसरी देखिने भन्ने व्यवस्थापन गर्न दिने नयाँ नियन्त्रण प्रणाली परीक्षण गरिरहेको बताएको छ।
गुगलका अनुसार एआई खोज सुविधाबाट बाहिरिने वेबसाइटहरूले एआई ओभरभ्युज र एआई मोडबाट ट्राफिक प्राप्त गर्ने छैनन्, तर यसले परम्परागत खोज नतिजालाई भने असर गर्ने छैन।
कम्पनीले एआईद्वारा तयार गरिएका उत्तरमा लिंकको संख्या पनि बढाइरहेको तथा प्रकाशकका लागि नयाँ विश्लेषणात्मक जानकारी उपलब्ध गराउन थालेको जनाएको छ।
सीएमएका प्रमुख कार्यकारी अधिकृत साराह कार्डेलले गुगललाई समाचार संस्थासहितका प्रकाशकहरूको सामग्री एआईद्वारा तयार गरिएका खोज नतिजामा स्पष्ट लिंकसहित उचित रूपमा श्रेय दिनुपर्ने बताइन्। उनले गुगलले हालै आफ्नो खोज व्यवसायमा परिवर्तन घोषणा गरेको र आज लागू गरिएका आवश्यकताहरू कम्पनीले अहिले तथा भविष्यमा गर्ने परिवर्तनलाई ध्यानमा राखेर तयार गरिएको बताइन्।
गुगलमाथि अमेरिका र युरोपेली संघलगायत विश्वका विभिन्न क्षेत्रमा नियामकीय निगरानी बढिरहेको छ। कम्पनीले मार्चमा बेलायती प्रतिस्पर्धासम्बन्धी चिन्तालाई सम्बोधन गर्न नयाँ खोज नियन्त्रण प्रणाली विकास गरिरहेको जनाएको थियो।
प्रकाशित: २१ जेष्ठ २०८३, बिहीबार
