काठमाडौं ।
स्पेसएक्सले सोमबार दिएको जानकारीअनुसार एपोलो ग्लोबल म्यानेजमेन्टको एक सहायक कम्पनीले कृत्रिम बुद्धिमताका चिप र सर्भर हार्डवेयर खरिद गरेर रकेट तथा एआई क्षेत्रमा काम गर्ने स्पेसएक्सलाई भाडामा दिनेछ। यस सम्झौताअन्तर्गत कुल साँवा भुक्तानी करिब ४० अर्ब डलर हुनेछ।
नियामक निकायमा बुझाइएको विवरणअनुसार उपकरण प्राप्त भएको मितिदेखि प्रत्येक भाडा सम्झौताको अवधि पाँच वर्षभन्दा केही बढी हुनेछ।
रोयटर्सका अनुसार चन्द्रमा र मंगल ग्रहमा पुग्ने आफ्नो महत्वाकांक्षी योजनाका लागि रकम जुटाउन स्पेसएक्सले कम्प्युटिङ क्षमताको बढ्दो मागबाट लाभ उठाउने प्रयास गरिरहेको छ। यस सम्झौताले कम्पनीले गरिरहेको ठूलो खर्चलाई उजागर गरेको छ।
कम्पनीले यस वर्षको अन्त्यसम्ममा सम्झौतालाई अन्तिम रूप दिने लक्ष्य राखेको छ। चिपहरू आपूर्ति भएपछि सन् २०२७ को पहिलो छ महिनामा भाडा सम्झौता सुरु हुने अपेक्षा गरिएको छ।
आइतबार स्पेसएक्सका प्रमुख कार्यकारी अधिकृत एलन मस्कले सामाजिक सञ्जाल एक्समा कम्पनीले ग्राफिक्स प्रोसेसिङ युनिट (जीपीयू) का लागि ४० अर्ब डलर ऋण जुटाउने सम्झौता गरेको बताएका थिए।
मस्कका अनुसार उक्त रकम मुख्यतः सन् २०२७ को पहिलो र दोस्रो त्रैमासिकमा आइपुग्ने चिपका लागि लक्षित छ। उनले यो खर्चले चालु त्रैमासिकमा ठूलो प्रभाव नपार्ने बताएका थिए।
स्पेसएक्सका प्रमुख वित्तीय अधिकारी ब्रेट जोनसेनले भने कम्पनीले चौथो त्रैमासिकमा ३५ अर्बदेखि ४० अर्ब डलरसम्म पुँजीगत खर्च गर्ने अपेक्षा गरेको बताएका थिए।
यस महिनाको सुरुवातमा रोयटर्सले स्पेसएक्सले एनभिडियाका चिप खरिद गर्न ४० अर्ब डलर जुटाउने विषयमा बैंक तथा सम्पत्ति व्यवस्थापन कम्पनीहरूसँग छलफल गरिरहेको समाचार प्रकाशित गरेको थियो।
प्रकाशित: ११ कार्तिक २०८३, बुधबार
