काठमाडौं ।
आइतबार बेइजिङमा आयोजित हाफ म्याराथन दौडमा चीनमा बनेका दर्जनौँ मानव-रोबोटले तीव्र रूपमा सुधार भइरहेको एथलेटिक क्षमता र स्वायत्त नेभिगेसन सीप देखाउँदै मानव धावकहरूलाई उछिनेका छन्, जसले यस क्षेत्रमा भइरहेको तीव्र प्राविधिक प्रगतिलाई उजागर गरेको छ।
गत वर्षको पहिलो संस्करणमा विभिन्न समस्या देखिएका थिए र अधिकांश रोबोटहरू दौड पूरा गर्न सकेका थिएनन्। गत वर्ष विजेता बनेको रोबोटले २ घण्टा ४० मिनेट समय लगाएको थियो, जुन परम्परागत दौडका मानव विजेताको समयभन्दा दोब्बरभन्दा बढी थियो।
यस वर्ष भने ठूलो अन्तर देखियो। सहभागी टोलीको संख्या २० बाट बढेर १०० भन्दा बढी पुगेको मात्र होइन, केही अग्रणी रोबोटहरू पेशेवर खेलाडीभन्दा पनि छिटो देखिए र मानव विजेताभन्दा १० मिनेटभन्दा बढीले अघि रहे।
गत वर्षभन्दा फरक, २१ किलोमिटर दौडमा झन्डै आधा रोबोटहरूले रिमोट कन्ट्रोल बिना नै स्वायत्त रूपमा कठिन भूभाग पार गरे। ठक्करबाट बच्न रोबोट र १२ हजार पुरुष तथा महिलाले छुट्टाछुट्टै ट्र्याकमा दौडे।
रोयटर्सका अनुसार चिनियाँ स्मार्टफोन ब्रान्ड अनरले विकास गरेको विजेता रोबोटले ५० मिनेट २६ सेकेन्डमा दौड पूरा गर्यो, जुन गत महिना लिस्बनमा युगान्डाका धावक ज्याकोब किप्लिमोले बनाएको हाफ म्याराथन विश्व कीर्तिमानभन्दा केही मिनेट छिटो हो।
ह्वावेबाट अलग भएको अनरका टोलीहरूले पहिलो तीन स्थान ओगटे, सबै रोबोटहरू स्वायत्त रूपमा चलेका थिए र विश्व कीर्तिमानभन्दा राम्रो समय निकालेका थिए।
विजेता टोलीका अनर इन्जिनियर डु शाओमीले रोबोट एक वर्षदेखि विकास गरिएको र उत्कृष्ट मानव धावकजस्तै देखाउन ९० देखि ९५ सेमी लामो खुट्टा तथा स्मार्टफोनमा प्रयोग हुने तरल शीतलन प्रविधि प्रयोग गरिएको बताए।
उनका अनुसार यो क्षेत्र अझ प्रारम्भिक चरणमा भए पनि भविष्यमा उत्पादन लगायत धेरै उद्योगलाई परिवर्तन गर्ने विश्वास व्यक्त गरे।
उनले भने, “छिटो दौडनु सुरुमा धेरै महत्वपूर्ण नलाग्न सक्छ, तर यसले संरचनात्मक मजबुती र शीतलन जस्ता प्रविधिको विकासमा सहयोग गर्छ र अन्ततः औद्योगिक प्रयोगमा पुग्छ।”
रोबोटिक्समा सुधार
दर्शकहरूले विभिन्न आकार र चाल भएका मानवरूपी रोबोटहरूको प्रदर्शनलाई चीनको रोबोटिक्स क्षेत्रमा भएको सुधारको प्रमाणका रूपमा हेरे।
बेइजिङ पोस्ट्स एन्ड टेलिकम्युनिकेसन्स विश्वविद्यालयका २३ वर्षीय इन्जिनियरिङ विद्यार्थी चु तियान्छीले भने, “मैले देखेको रोबोटको दौडने शैली निकै प्रभावशाली थियो। एआई छोटो समयमै विकास भएको भए पनि यस्तो स्तरको प्रदर्शन देख्दा म निकै प्रभावित छु।”
उनले थपे, “भविष्य निश्चय नै एआईको युग हुनेछ। अहिले एआई प्रयोग गर्न नजाने वा त्यसको विरोध गर्ने मानिसहरू भविष्यमा पछि पर्नेछन्।”
अर्का दर्शक ११ वर्षीय विद्यार्थी गुओ युकुनले यो दौड हेरेपछि भविष्यमा रोबोटिक्समा विश्वविद्यालय अध्ययन गर्ने प्रेरणा पाएको बताए।
उनले आफूले बेइजिङस्थित विद्यालयमा नियमित रूपमा रोबोटिक्स सिद्धान्त र प्रोग्रामिङ पढ्ने गरेको र अन्तर्राष्ट्रिय इन्फर्मेटिक्स ओलम्पियाडका लागि विद्यालय टोलीमा सहभागी रहेको बताए।
प्रकाशित: ६ बैशाख २०८३, आईतवार
