काठमाडौं ।
ओपनएआईले एआई एजेन्ट ओपनक्लका विकासकर्ता पिटर स्टाइनबर्गरलाई नियुक्त गरेको छ। कम्पनीका सीईओ साम अल्टम्यानले सामाजिक सञ्जाल एक्समार्फत स्टाइनबर्गरलाई “अर्को पुस्ताका व्यक्तिगत एजेन्ट विकास गर्न” भित्र्याइएको बताएका छन्। स्टाइनबर्गरले पनि आफ्नै ब्लगमार्फत यो समाचार पुष्टि गरेका छन्।
उनका अनुसार ओपनक्ल अब एक फाउन्डेसन अन्तर्गत खुला र स्वतन्त्र परियोजनाका रूपमा रहनेछ। “म सबैका लागि एजेन्ट प्रविधि उपलब्ध गराउने काममा लाग्न ओपनएआईमा सामेल हुँदैछु,” उनले लेखेका छन्।
रिपोर्टअनुसार स्टाइनबर्गर मेटामा पनि जान सक्ने छलफलमा थिए र दुवै कम्पनीले अर्बौं डलर बराबरको प्रस्ताव राखेको बताइएको छ। इम्प्लिकेटर डट एआईका अनुसार ओपनक्लको १ लाख ९६ हजार गिटहब स्टार र साप्ताहिक २० लाख आगन्तुक यसको मुख्य आकर्षण थिए, कोडबेसभन्दा पनि बढी।
ओपनक्लले प्रयोगकर्तालाई इमेल, संगीत स्ट्रिमिङ र घरका स्मार्ट उपकरणजस्ता एपहरू नियन्त्रण गर्न सक्ने आफ्नै एआई एजेन्ट बनाउन दिन्छ। यसको वेबसाइटअनुसार यसले व्हाट्सएप, डिस्कर्ड, स्ल्याक,आईमेसेज,फिलिप्स ह्यु र स्पोटिफाई जस्ता लोकप्रिय सेवा र एपहरूसँग अन्तरक्रिया गर्न सक्छ। प्रयोगकर्ताहरूले यसमार्फत कोड लेख्ने, इनबक्स सफा गर्ने, अनलाइन किनमेल गर्ने जस्ता सहायक काम गरिरहेका छन्।
ओपनक्ललाई यसअघि “क्लडबोट” भनिन्थ्यो तर एन्थ्रोपिकले आफ्नो “क्लाउड” ब्रान्डसँग समानता भएको भन्दै नाम परिवर्तन गर्न बाध्य पारेको थियो। यसलाई प्रायः एन्थ्रोपिकको कोडिङ केन्द्रित उपकरणसँग तुलना गरिन्छ।
अल्टम्यानले आफ्नो घोषणामा “भविष्य बहु–एजेन्ट प्रणालीतर्फ जाँदैछ र त्यसका लागि खुला स्रोत समर्थन आवश्यक छ” बताएका छन्। उनले ओपनक्ल खुला स्रोत परियोजनाका रूपमा फाउन्डेसनमा रहने र ओपनएआईबाट समर्थन पाउने बताएका छन्।
स्टाइनबर्गरले भनेका छन्, “म ठूलो कम्पनी बनाउनु भन्दा संसार बदल्न चाहन्छु र ओपनएआई सँग सहकार्य गर्नु यो लक्ष्य सबैसम्म पुर्याउने सबैभन्दा छिटो बाटो हो।”
प्रकाशित: ५ फाल्गुन २०८२, मंगलवार
