दक्षिण कोरियाली क्रिप्टोकरेन्सी उद्यमी डो क्वोन अमेरिकामा दोषी ठहर हुने सम्भावना

काठमाडौं ।

अमेरिकामा ठगी आरोप खेपिरहेका दक्षिण कोरियाली क्रिप्टोकरेन्सी उद्यमी डो क्वोन दोषी ठहर हुने सम्भावना रहेको अमेरिकी अदालतको अभिलेखले सोमबार देखाएको छ। उनले विकास गरेका दुई डिजिटल मुद्राले २०२२ मा करिब ४० अर्ब डलरको नोक्सान बेहोरेका थिए।

संक्षिप्त तालिका आदेशमा अमेरिकी जिल्ला न्यायाधीश पॉल एङ्गलमेयरले क्वोनले आफ्नो बयान परिवर्तन गर्न सक्ने जानकारी पाएको र मंगलबार बिहान १०:३० बजे (१४३० जीएमटी) म्यानह्याटन संघीय अदालतमा सुनुवाइ तय गरिएको उल्लेख गरेका छन्।

रोयटर्सका अनुसार सिङ्गापुरमा आधारित टेराफर्म ल्याब्सका सह-संस्थापक क्वोनले टेरा यूएसडी र लुना मुद्रा विकास गरेका थिए। उनले पहिल्यै आफूविरुद्ध लगाइएको नौ बुँदे अभियोगपत्रमा आफू दोषी नरहेको बयान दिएका थिए। उक्त ९ बुँदामा प्रतिभूति ठगी, वायर ठगी, वस्तु ठगी र रकम सेतो पार्ने षड्यन्त्रको आरोप लगायत थिए।

क्वोनका वकिल र आरोप लगाउने म्यानह्याटन अमेरिकी अटर्नी कार्यालय दुवैले यसबारे सोधिएका प्रश्नमा तत्काल प्रतिक्रिया दिएका छैनन्।