आईपीओ निस्कासन अघि कोरविभद्वारा ओपनएआईसँग १२ अर्ब डलरको सम्झौता

काठमाडौं ।

एनभिडियाद्वारा समर्थित कृत्रिम बुद्धिमता स्टार्टअप कोरविभले आफ्नो बहुप्रतीक्षित सेयर बजार सूचीकरण अघि ओपनएआई सँग ११.९ अर्ब डलरको पाँचवर्षीय सम्झौता गरेको छ।

कोरविभ ले सोमबार जारी गरेको विज्ञप्तिमा ओपनएआईलाई एआई पूर्वाधार उपलब्ध गराउने सहमति भएको जनाएको छ। यसअघि रोयटर्सले यसबारे विशेष रिपोर्ट प्रकाशित गरेको थियो।

सम्झौताअनुसार ओपनएआईले कोरविभ मा स्वामित्व हिस्सेदारी प्राप्त गर्नेछ, जसअन्तर्गत कोरविभले आफ्नो प्रारम्भिक सार्वजनिक निष्कासन (आईपीओ) को समयमा निजी प्लेसमेन्टमार्फत च्याटजीपीटी निर्माता ओपनएआई लाई ३५० मिलियन डलर बराबरको सेयर प्रदान गर्नेछ।

न्यू जर्सीको लिभिङ्स्टनमा आधारित र अमेरिकाभरी तीव्र रूपमा बढिरहेको एआई स्टार्टअपमध्ये एक कोरविभले ओपनएआईलाई दिने सेयर बिक्रीबाट कुनै प्रत्यक्ष आम्दानी प्राप्त गर्ने छैन।

“कोरविभ ओपनएआईको पूर्वाधार पोर्टफोलियोको महत्त्वपूर्ण हिस्सा हो, जसले माइक्रोसफ्ट र ओर्याकलसँगको हाम्रो व्यावसायिक सम्झौताहरू तथा सफ्टब्याङ्क सँगको स्टारगेट संयुक्त उपक्रमलाई पूरक बनाउँछ,” ओपनएआईका सीईओ साम अल्टम्यानले भने।

कोरविभ को आगामी सेयर बिक्रीलाई यो सम्झौताले ठूलो प्रवर्द्धन गर्नेछ, जसलाई २०२५ को प्रमुख अमेरिकी आईपीओ मध्येको एक मानिएको छ।

एआईमा लगानीकर्ताहरूको चासो तीव्र रूपमा बढिरहेको बेला ओपनएआई सँगको यो सम्झौता भएको हो। एनभिडिया तथा अन्य ठूला प्रविधि कम्पनीहरूलाई अघि बढाउने एआई बूमका कारण डाटा सेन्टर तथा उच्च-शक्ति भएका सर्भरहरूको माग विश्वभर बढेको छ।

कोरविभको आईपीओ सफल भएमा हाल सार्वजनिक बजारमा प्रवेश गर्नेबारे सोचिरहेका अन्य एआई स्टार्टअपहरूका लागि मार्ग खुल्ने संकेत मिल्न सक्छ। डाटा सेन्टर सञ्चालनकर्ता स्विचले करिब ४० अर्ब डलरको मूल्याङ्कनसहित आईपीओ गर्ने सम्भावना रहेको रोयटर्सले गत वर्ष रिपोर्ट गरेको थियो।