एआईले सन् २०२४ मा चुनावलाई प्रभावित गरेको कुनै सङ्केत छैन– मेटा

काठमाडौं ।

मेटाले मङ्गलबार कृत्रिम बुद्धिमत्ता (आर्टिफिसियल इन्टेलिजेन्स–एआई) ले विश्वभरका मतदाताहरूलाई भ्रमित गर्न सञ्चार माध्यममा झुटो सूचना ल्याउँछ भन्ने डर सत्य साबित नभएको बताएको छ।

मेटा ग्लोबल अफेयर्सका अध्यक्ष निक क्लेगले पत्रकारहरूलाई कम्पनीको प्लेटफर्ममा भ्रामक प्रभाव अभियानविरुद्ध सुरक्षा मजबुत रहेको र त्यस्ता समन्वित प्रयासहरूले अनलाइनमा ध्यान आकर्षित नगरेको बताए।

“मेरो विचारमा जेनेरेटिभ एआई तिनीहरूका लागि हाम्रो सुरक्षा प्रणालीबाट छल्न प्रभावकारी उपकरण थिएन”, क्लेगले समन्वित झुटो सूचना अभियानका पछाडि रहेकाहरूका बारेमा भने, “अपेक्षा र वास्तविकता बीचको अन्तर धेरै महत्त्वपूर्ण छ।”

मेटाका अनुसार यसले हालै अवरुद्ध गरेका अधिकांश प्रभाव अभियानहरू रुस, इरान र चीनका कर्ताहरूद्वारा सञ्चालित थिए ।

जेनेरेटिभ एआई उपकरणहरू झन् परिष्कृत र व्यापक हुने अपेक्षा गरिएकाले मेटाको आफ्नो सतर्कता कम गर्ने कुनै इरादा छैन ।

क्लेगले सन् २०२४ लाई अहिलेसम्मको सबैभन्दा ठूलो चुनावी वर्ष भने। यो वर्ष विश्वभरका धेरै देशमा करिब दुई अर्ब मानिसले मतदान गरेको अनुमान गरिएको छ।

“यस वर्षको अवधिमा हुने चुनावमा जेनेरेटिभ एआईले पार्ने सम्भावित प्रभावका बारेमा मानिसहरू चिन्तित थिए”, उनले पत्रकारहरूसँग भने, “व्यापक गहिरो नक्कली र एआई सक्षम गलत सूचना अभियानहरू जस्ता चिजहरूको सम्भावित जोखिमहरूको बारेमा सबै प्रकारका चेतावनीहरू थिए।”

क्लेगका अनुसार चुनावमा जेनेरेटिभ एआईको दुरुपयोग रोक्न उद्योगव्यापी प्रयास भयो।

मेटाका मुख्य कार्यकारी मार्क जुकरबर्ग र राष्ट्रपति–निर्वाचित डोनाल्ड ट्रम्पले गएको साता ट्रम्पको फ्लोरिडा रिसोर्टमा मेटाको सामग्री नियन्त्रण नीतिबारे छलफल गरेको बारे आफूलाई जानकारी नभएको उनले बताए।

प्लेटफर्मले राजनीतिक रूपमा रूढीवादी दृष्टिकोणलाई सेन्सर गरेको आरोप लगाउँदै ट्रम्पले मेटाको आलोचना गरेका छन्।

“मार्क प्राविधिक क्षेत्रमा अमेरिकाको नेतृत्व कायम राख्नका लागि कुनै पनि प्रशासनले गर्नुपर्ने बहसमा सक्रिय भूमिका खेल्न धेरै उत्सुक हुनुहुन्छ… र विशेष गरी एआईले त्यस क्षेत्रमा खेल्ने महत्त्वपूर्ण भूमिकाका बारेमा”, क्लेगले भने। रासस/एएफपी