साइबरट्रक विद्युतीय पिकप सन् २०२२ अगाडि नआउने टेस्लाद्वारा पुष्टि

काठमाडौं ।

टेस्लाले हालै साइबरट्रक विद्युतीय पिकप सन् २०२२ यता सार्वजनिक नहुने पुष्टि गरेको छ। कम्पनीले केही समयअघिदेखि नै यो गाडीको उत्पादनमा ढिलाइ हुनसक्ने बताउँदै आएको थियो।

कम्पनीले साइबरट्रक सन् २०१९ मा सार्वजनिक गरेको थियो भने २ वर्षभित्र बजारमा उपलब्ध हुने घोषणासमेत गरेको थियो। गत वर्ष कम्पनीले म्याद सकिँदै आएपछि यसको उत्पादन केही ढिलो हुनसक्ने बताएको थियो।

सीईओ इलन मस्कले पूरै निर्माण प्रक्रिया आवश्यक पर्ने स्टील एक्सोस्केलिटन बडीलगायतका फिचरका कारण साइबरट्रकको उत्पादनमा टेस्लाले चुनोती सामना गरिरहेको बताएका थिए।

ती चिन्ताहरुका बावजूद र २०२१ को म्याद नजिकै आउनैलाग्दा टेस्लाले साइबरट्रकको उत्पादनमा ढिलाइ हुने पुष्टि गरेको हो।

दोस्रो त्रैमासको आम्दानी विवरण सार्वजनिक गर्ने क्रममा गत महिना टेस्लाले साइबरट्रक मोडल वाईपछि टेक्ससमा रहेको गिगाफ्याक्ट्रीमा बन्ने भन्दै यो वर्षको अन्त्यमै आउने बताएको थियो।

मोडल वाइको उत्पादन यो वर्षको अन्त्यसम्ममा गिगाफ्याक्ट्री टेक्ससमा शुरु हुने भनिएकाले साइबरट्रकको उत्पादन पनि यसै वर्ष थालनी हुन सक्ने कुरा अझै नकार्न नमिल्ने भए पनि कम्पनीले हालै म्याद बढाएको हो।