आफ्ना सेवा र उपकरण बिक्री वृद्धि गर्न एआई बजारमा निर्भर हुँदै नोकिया

काठमाडौं ।

फिनल्यान्डको दूरसञ्चार उपकरण निर्माता कम्पनी नोकियाले तेस्रो त्रैमासिकमा राम्रो वित्तीय नतिजा सार्वजनिक गरेको छ। तर, कम्पनीको आम्दानी वृद्धिको लगभग सबै हिस्सा दूरसञ्चार सेवा प्रदायकबाट नभई कृत्रिम बुद्धिमता (एआई) र क्लाउड सेवा ग्राहकबाट आएको छ।

नोकियाको व्यवसाय अहिले मुख्यतः दुई ठूला क्षेत्रमा विभाजित छ : फिक्स्ड नेटवर्क र मोबाइल नेटवर्क उपकरण। आम्दानीका आधारमा मोबाइल नेटवर्क अझै पनि कम्पनीको सबैभन्दा ठूलो व्यवसाय हो। तर, आम्दानी वृद्धि र नयाँ अवसरको अधिकांश हिस्सा फिक्स्ड नेटवर्क व्यवसायबाट आएको छ।

टेलिकम्स डटकमका अनुसार यस क्षेत्रमा नोकियाले डाटा सेन्टरभित्र र डेटा सेन्टरहरूबीच सञ्जाल जडान उपलब्ध गराएर राम्रो व्यवसाय गरिरहेको छ। एआईको तीव्र विस्तारका कारण यो बजार अहिले आकर्षक बनेको छ।

तेस्रो त्रैमासिकमा नोकियाको खुद बिक्री गत वर्षको सोही अवधिको तुलनामा ९ प्रतिशत बढेको छ। तर, यो वृद्धि मुख्यतः नेटवर्क पूर्वाधार (फिक्स्ड) विभागका कारण भएको हो, जसको बिक्री १५ प्रतिशत बढेको छ।

यसको तुलनामा मोबाइल पूर्वाधारको बिक्री ५ प्रतिशत मात्र बढेको छ। ग्राहकको प्रकारअनुसार हेर्दा दूरसञ्चार ग्राहकबाट हुने आम्दानीमा कुनै वृद्धि भएको छैन। लगभग सबै वृद्धि एआई र क्लाउड सेवा ग्राहकबाट आएको छ।

नोकियाका प्रमुख कार्यकारी अधिकृत जस्टिन हटार्डले भने, “एआई पूर्वाधारको बढ्दो माग पूरा गर्न नोकियाका विशेष क्षमता उपयुक्त छन्। यस्तो पूर्वाधार अझ ठूलो, विभिन्न स्थानमा फैलिएको र एकअर्कासँग व्यापक रूपमा जोडिएको हुन्छ। हामीले आफ्नो विशिष्ट क्षमता देखाउन र ठूलो स्तरमा क्लाउड सेवा उपलब्ध गराउने कम्पनीहरूसँग मिलेर नयाँ प्रविधि विकास गर्न सक्ने क्षेत्रमा लगानी गरिरहेका छौँ। फिनल्यान्डमा गुगलको १३ अर्ब युरो लगानीलाई सहयोग गर्ने हाम्रो साझेदारी यसको एउटा उदाहरण हो। हाम्रा अप्टिकल र आईपी नेटवर्कले एआई पूर्वाधारका लागि आवश्यक महत्त्वपूर्ण सञ्जाल जडान उपलब्ध गराउँछन्।”

उनले थपे, “एआईमा आधारित नेटवर्क अब भौतिक संसारमा पनि विस्तार भइरहेका छन्। यस बजारका लागि आवश्यक कार्यक्षमता उपलब्ध गराउन हामीले आफ्नो एआई–आरएएन प्लेटफर्म विकास गरिरहेका छौँ। टी–मोबाइल र एनभिडियासँग मिलेर हामीले गत वर्ष घोषणा गरेको प्रतिबद्धताअनुसार सञ्चालनमा रहेको दूरसञ्चार नेटवर्कमा विश्वकै पहिलो एआई–आरएएन कल सफलतापूर्वक सम्पन्न गरेका छौँ। व्यावसायिक रूपमा सेवा सुरु गर्ने दिशामा अघि बढ्दै गर्दा हाम्रो प्लेटफर्मले उपलब्ध गराउने सुविधा र स्पेक्ट्रमको प्रभावकारी प्रयोग गर्ने क्षमता बजारमा विशिष्ट छन्।”

हटार्डको भनाइले मोबाइल नेटवर्कमा थप कम्प्युटिङ क्षमता समावेश गर्ने अवधारणा एआई–आरएएनप्रति नोकिया कति निर्भर छ भन्ने देखाउँछ। यस अवधारणालाई दूरसञ्चार सेवा प्रदायकहरूले समर्थन गरिरहेको देखाउने उद्देश्यले एनभिडियाले हिजो सार्वजनिक गरेका प्रमुख घोषणाहरूमा पनि एआई–आरएएनले महत्त्वपूर्ण स्थान पाएको थियो। ती घोषणामा नोकिया, टी–मोबाइल र एनभिडियाबीच सम्पन्न कल पनि समावेश थियो। एआई–आरएएनको सफलता नोकियाको मोबाइल व्यवसायको भविष्यका लागि अस्तित्वकै सवाल बन्ने देखिएको छ।

नोकियाको रणनीतिक प्राथमिकतामा पनि यही क्रम देखिन्छ। ती प्राथमिकतामध्ये अन्तिम दुईवटा व्यवसायलाई सरल र व्यवस्थित बनाउने उपायसँग सम्बन्धित छन्। समग्रमा नोकियाको रणनीति अहिले लगभग पूर्ण रूपमा एआईमा निर्भर देखिन्छ। चाहे त्यो डेटा सेन्टरमार्फत होस् वा रेडियो एक्सेस नेटवर्क (आरएएन) मार्फत।

अहिलेका लागि यस्तो रणनीति नराम्रो होइन। तर, एआईमा ठूलो लगानी आवश्यक पर्ने र त्यसबाट अपेक्षित प्रतिफल प्राप्त हुन्छ कि हुँदैन भन्ने प्रश्न उठ्न थालेकाले यो बजारमा अस्थिरता बढिरहेको सङ्केत देखिएका छन्।

सायद यही कारणले नोकियाले नाफासम्बन्धी अपेक्षालाई उल्लेख्य रूपमा उछिने पनि यो समाचार तयार पार्दासम्म कम्पनीको सेयर मूल्य ४ प्रतिशत घटेको थियो। यस वर्षको सुरुदेखि हेर्दा सेयर मूल्य अझै उच्च अवस्थामा रहे पनि जुन ३ मा पुगेको उच्चतम मूल्यको तुलनामा अहिले आधा छ।

यस अवधिमा एआईसम्बन्धी बजारको उत्साह केही घटेको छ। सम्भवतः यही कारणले तेस्रो त्रैमासिकमा एआईसम्बन्धी नयाँ अर्डरको मात्रा अघिल्लो त्रैमासिकको तुलनामा निकै कम भएको हो। अहिले नोकिया धेरै हदसम्म एआई बजारमा निर्भर कम्पनी बनेको छ।