काठमाडौं ।
आईफोनले अनावश्यक रूपमा मोबाइल डाटा खपत गरिरहेको छ? केही सामान्य सेटिङ परिवर्तन गरेर डाटा खपत घटाउन सकिन्छ। विशेषगरी सीमित डाटा प्याकेज प्रयोग गर्ने, विदेश यात्रा गर्ने वा मोबाइल हटस्पट चलाउनेहरूका लागि यी उपाय उपयोगी हुन सक्छन्।
प्रविधिसम्बन्धी वेबसाइट इन्ग्याजेटका अनुसार आईफोनमा डाटा खपत नियन्त्रण गर्न यी सात उपाय अपनाउन सकिन्छ।
यस्ता छन् आईफोनमा मोबाइल डाटा घटाउने मुख्य उपाय
लो डाटा मोड सक्रिय गर्नुहोस्
आईफोनको ‘सेटिङ्स’ मा गएर ‘सेल्युलर’ र त्यसपछि ‘डाटा मोड’ खोल्नुहोस्। त्यहाँ ‘स्ट्यान्डर्ड’ को सट्टा ‘लो डाटा मोड’ छान्नुहोस्।
यो सुविधा सक्रिय हुँदा भिडियो तथा भिडियो कलको गुणस्तर घट्छ, स्वचालित अपडेट र ब्याकअप सीमित हुन्छन् र एपमा नयाँ सामग्री अपडेट हुने क्रम कम हुन्छ। विदेशमा ई-सिम प्रयोग गर्दा वा डाटा बचाउनुपर्ने अवस्थामा यो विकल्प उपयोगी हुन्छ।
ब्याकग्राउन्डमा डाटा चल्ने एप बन्द गर्नुहोस्
प्रयोग नगरेका बेला पनि केही एपले पृष्ठभूमिमा नयाँ सामग्री अपडेट गरिरहेका हुन्छन्। यसले मोबाइल डाटा खपत बढाउँछ।
यसलाई नियन्त्रण गर्न ‘सेटिङ्स’ मा गएर ‘जनरल’ र त्यसपछि ‘ब्याकग्राउन्ड एप रिफ्रेस’ खोल्नुहोस्। यसलाई ‘वाई-फाई’ मा मात्र सीमित गर्न वा आवश्यक नपर्ने एपका लागि बन्द गर्न सकिन्छ। यसो गर्दा एपले मोबाइल डाटा प्रयोग गरेर पृष्ठभूमिमा सामग्री अपडेट गर्न पाउँदैन।
बढी डाटा खाने एपको मोबाइल डाटा बन्द गर्नुहोस्
कुन एपले कति डाटा प्रयोग गरिरहेको छ भन्ने जानकारी आईफोनमै हेर्न सकिन्छ।
‘सेटिङ्स’ भित्र ‘सेल्युलर’ मा गएर ‘सो अल’ छान्नुहोस्। त्यहाँ एपअनुसार डाटा खपतको विवरण देखिन्छ। धेरै डाटा प्रयोग गर्ने तर मोबाइल डाटामा आवश्यक नपर्ने एपको विकल्प बन्द गर्न सकिन्छ। यसपछि उक्त एपले मोबाइल डाटा प्रयोग गर्न पाउँदैन।
भिडियोको गुणस्तर घटाउनुहोस् र सामग्री डाउनलोड गर्नुहोस्
यूट्युब तथा सामाजिक सञ्जालमा भिडियो स्वतः चल्ने सुविधा बन्द गर्नुहोस्। भिडियोको गुणस्तर घटाउँदा पनि डाटा खपत कम हुन्छ। एप्पल म्युजिकजस्ता स्ट्रिमिङ एपमा मोबाइल डाटाका लागि कम गुणस्तर छनोट गर्न सकिन्छ। पोडकास्ट एपमा मोबाइल डाटा प्रयोग गरेर डाउनलोड हुने सुविधा पनि बन्द गर्न सकिन्छ।
फोनमा पर्याप्त भण्डारण क्षमता छ भने वाई-फाईमा हुँदा नै नक्सा, चलचित्र, संगीत र पोडकास्ट डाउनलोड गरेर राख्नुहोस्। यसले पछि मोबाइल डाटा प्रयोग गरेर ती सामग्री हेर्न वा सुन्नुपर्ने आवश्यकता घटाउँछ।
कनेक्टिभिटी असिस्ट बन्द गर्नुहोस्
आईफोनमा वाई-फाई कमजोर हुँदा पनि मोबाइल डाटा प्रयोग हुन सक्छ। ‘कनेक्टिभिटी असिस्ट’ सक्रिय हुँदा वाई-फाई कमजोर वा व्यस्त भएको अवस्थामा आईफोनले मोबाइल डाटा प्रयोग गरेर इन्टरनेट जडान सहज बनाउँछ।
यसलाई जाँच गर्न ‘सेटिङ्स’ भित्र ‘वाई-फाई’ मा जानुहोस् र तलतिर रहेको ‘कनेक्टिभिटी असिस्ट’ विकल्प बन्द गर्नुहोस्। यसो गर्दा कमजोर वाई-फाईका कारण अनावश्यक रूपमा मोबाइल डाटा खर्च हुने सम्भावना घट्छ।
स्वचालित डाउनलोड र मोबाइल डाटा ब्याकअप बन्द गर्नुहोस्
एप स्टोरबाट स्वचालित रूपमा एप डाउनलोड वा अपडेट हुँदा धेरै डाटा खर्च हुन सक्छ। यसलाई नियन्त्रण गर्न ‘सेटिङ्स’ भित्र ‘एप्स’ र त्यसपछि ‘एप स्टोर’ मा जानुहोस्। मोबाइल डाटाअन्तर्गतको ‘अटोमेटिक डाउनलोड्स’ बन्द गर्नुहोस्।
नयाँ एप डाउनलोड गर्दा पनि ‘अल्वेज आस्क’ वा ‘आस्क इफ ओभर २०० एमबी’ विकल्प राख्न सकिन्छ। यसले ठूलो आकारका एप अनायासै मोबाइल डाटाबाट डाउनलोड हुन रोक्छ।
त्यसैगरी, आफ्नो नाममा थिचेर ‘आईक्लाउड’ र ‘आईक्लाउड ब्याकअप’ मा जानुहोस्। त्यहाँ मोबाइल डाटाबाट ब्याकअप हुने सुविधा बन्द गर्दा ब्याकअप वाई-फाईमा मात्र हुन्छ।
सम्भव भएसम्म वाई-फाई प्रयोग गर्नुहोस्
घर, कार्यालय वा अन्य सुरक्षित स्थानमा उपलब्ध वाई-फाई प्रयोग गर्दा मोबाइल डाटा बचाउन सकिन्छ। परिवारका सदस्यले नियमित रूपमा धेरै डाटा प्रयोग गर्छन् भने छुट्टै हटस्पट उपकरण वा सबैले प्रयोग गर्न मिल्ने डाटा प्याकेजको विकल्प पनि विचार गर्न सकिन्छ।
भिडियो हेर्ने र भिडियो कल गर्ने काममा धेरै डाटा खपत हुने भएकाले मोबाइल डाटा प्रयोग गर्दा यस्ता गतिविधि कम गर्नुहोस्। आवश्यक परे भिडियोको गुणस्तर घटाउनुहोस् वा भिडियो कलको सट्टा अडियो कल प्रयोग गर्नुहोस्।
प्रकाशित: २६ आश्विन २०८३, सोमबार
