काठमाडौं ।
माइक्रोसफ्टका सीईओ सत्या नाडेला एआईको सुरक्षा कसरी सुधार गर्न सकिन्छ भन्ने विषयमा विस्तृत धारणा सार्वजनिक गर्ने पछिल्ला प्रविधि क्षेत्रका कार्यकारी बनेका छन्।
शनिबार बिहान एक्समा पोस्ट गर्दै नाडेलाले एआईको ‘विश्वास संरचना’ को पुनः मूल्याङ्कन गर्ने समय आएको बताएका छन्।
“हामीले सुपर इन्टेलिजेन्सलाई एकअर्काभित्र रहेका ब्ल्याक बक्सहरूको समूहका रूपमा लिनु हुँदैन र त्यसका सिफारिस, उत्तर तथा कार्यलाई सिधै स्वीकार वा अस्वीकार गर्नु हुँदैन,” नाडेलाले लेखेका छन्। उनले अमेरिकी राष्ट्रपति डोनाल्ड ट्रम्पको प्रशासनले एआईका लागि रुचाएको शब्द ‘सुपर इन्टेलिजेन्स’ प्रयोग गरेका छन्।
नाडेलाका अनुसार यसका लागि “मोडललाई त्यसको काम सञ्चालन गर्ने प्रणालीबाट अलग राख्नु” र “नियन्त्रण तथा सुरक्षा उपायलाई बाह्य रूपमा व्यवस्थित गर्नु” आवश्यक छ।
टेकक्रञ्चका अनुसार उनले मोडलले गर्ने हरेक महत्त्वपूर्ण कार्यको अभिलेख राख्नुपर्ने र त्यसका लागि परिवर्तन गर्न नसकिने, मानिसले पढ्न सक्ने प्रमाण उपलब्ध हुनुपर्ने बताएका छन्। साथै, कुनै पनि काम भइरहेका बेला अधिकारप्राप्त व्यक्तिले मोडललाई रोक्न वा बन्द गर्न सक्ने प्रणाली आवश्यक रहेको उनको भनाइ छ।
“हामीले मोडलको प्रणालीमा समस्या आइसकेको छ भन्ने मान्यताका साथ चल्नुपर्छ र सुरुदेखि नै त्यसलाई नियन्त्रणमा राख्नुपर्छ,” उनले भने। “यसलाई आपत्कालीन ब्रेकका रूपमा सोच्नुहोस्।”
नाडेलाको यस्तो भनाइ एआई क्षेत्रका प्रमुख कम्पनीहरूले आफ्ना मोडलमाथिको नियन्त्रण गुमाएको जस्तो देखिने घटनाहरू बढ्दै गएको स्वीकार गरिरहेका बेला आएको हो। यसअघि एन्थ्रोपिकका प्रमुख कार्यकारी अधिकृत डारियो अमोडेईले पनि एआईको विकासलाई थप सावधानीपूर्वक अघि बढाउने योजना सार्वजनिक गरेका थिए।
प्रकाशित: २५ आश्विन २०८३, आईतवार
