काठमाडौं ।
ओपनएआईको जीपीटी-६ आस्ट्रासार्वजनिक भएपछि बढेको प्रतिस्पर्धालाई सामना गर्न एन्थ्रोपिकले नयाँ एआई मोडल सार्वजनिक गर्नेबारे विचार गरिरहेको तीन स्रोतले बताएका छन्।
कम्पनीले सम्भावित आईपीओको तयारी गरिरहेका बेला नयाँ मोडल ल्याउनेबारे छलफल गरिरहेको हो। यसअघि एन्थ्रोपिकका प्रमुख कार्यकारी अधिकृत डारियो अमोडेइले एआई उद्योगलाई नयाँ क्षमताको विकास र सार्वजनिक गर्ने गति कम गर्न आह्वान गरेका थिए।
प्रत्यक्ष प्रतिस्पर्धी ओपनएआईबाट बढेको दबाबलाई सम्बोधन गर्न नयाँ मोडल ल्याउने सम्भावनाबारे छलफल भइरहेको समयमा अमोडेइले सुरक्षा चिन्तालाई सम्बोधन गर्न विश्वव्यापी एआई समुदायलाई नयाँ क्षमताको विकास र सार्वजनिक गर्ने गति कम गर्न आग्रह गरेका थिए।
‘हामीले एआई मोडलको क्षमता सुधार गर्ने गति कम गर्नुपर्छ,’ अमोडेइले सेप्टेम्बर १२ मा प्रकाशित ३ हजार ८ सय शब्दको निबन्धमा लेखेका थिए।
रोयटर्सका अनुसार इन्टरनेटमा एआई एजेन्टहरूको ठूलो संख्याले नियन्त्रण लिन सक्ने र मानिसको नियन्त्रणभन्दा तीव्र गतिमा अघि बढ्न सक्ने जोखिमबारे चिन्ता व्यक्त गरिएको उक्त निबन्धलाई ओपनएआई का प्रमुख कार्यकारी अधिकृत साम अल्टम्यान र स्पेसएक्स का प्रमुख कार्यकारी अधिकृत एलन मस्कले समर्थन गरेका थिए।
यसै महिना सार्वजनिक भएको ओपनएआई को जीपीटी-६ आस्ट्राले व्यवसायिक क्षेत्रमा राम्रो प्रयोगकर्ता प्रतिक्रिया पाएपछि केही लगानीकर्ताले एन्थ्रोपिक को उद्यम एआई उपकरणको अग्रणी प्रदायकका रूपमा रहेको अवस्थाबारे पुनर्विचार गरिरहेको रोयटर्सलाई बताएका छन्।
कम्पनीसँग परिचित एक व्यक्तिका अनुसार एन्थ्रोपिक ले नयाँ मोडल सार्वजनिक गर्ने विषयमा छलफल गर्दै त्यसको सुरक्षाको मूल्यांकन पनि गरिरहेको छ।
कम्पनीको सोचसँग परिचित व्यक्तिहरूका अनुसार बढ्दो ब्याजदरका कारण लगानीकर्ताले अपेक्षित नाफा कहिले प्राप्त हुन्छ भन्ने विषयमा बढी ध्यान दिन थालेका बेला नयाँ मोडल सार्वजनिक गर्न गरिने लगानी र कम्पनीको नाफा बढाउने प्रयासबीच कसरी सन्तुलन कायम गर्ने भन्ने विषयमा पनि छलफल भइरहेको छ।
खर्चसम्बन्धी यो बहसले एआई क्षेत्रका प्रमुख कम्पनीहरूमा छिटो दिगो नगद प्रवाह सिर्जना गर्न बढ्दो दबाब देखाउँछ। बढ्दो ब्याजदरका साथै विशेषगरी चीनका खुला स्रोत एआई प्रदायकबाट बढेको प्रतिस्पर्धाले पनि यस्तो दबाब बढाएको छ।
एन्थ्रोपिकले यस समाचारबारे टिप्पणी गर्न अस्वीकार गरेको रोयटर्सले उल्लेख गरेको छ।
सम्भावित नयाँ मोडलको सार्वजनिक घोषणा भएपछि ओपनएआई विरुद्ध आफ्नो उद्यम बजारको स्थिति कसरी कायम राख्ने र प्रतिस्पर्धीभन्दा आफूलाई फरक बनाएको सुरक्षालाई प्राथमिकता दिने पहिचानलाई कसरी कायम राख्ने भन्ने एन्थ्रोपिक का लागि परीक्षण हुने देखिन्छ।
ओपनएआई ले सेप्टेम्बर ३ मा जीपीटी-६ आस्ट्रासार्वजनिक गर्दै कम्प्युटर प्रयोग, सफ्टवेयर इन्जिनियरिङ, साइबर सुरक्षा र व्यावसायिक काममा सुधार भएको दाबी गरेको थियो। उक्त मोडलले उद्यम प्रयोगकर्ता र विकासकर्ताबाट राम्रो प्रतिक्रिया पाएपछि सम्भावित एन्थ्रोपिक आईपीओका लगानीकर्ताले ओपनएआई ले एन्थ्रोपिक को बजार हिस्सा लिन सक्ने सम्भावनाबारे चासो राख्न थालेका छन्। पछिल्लो केही महिनादेखि एन्थ्रोपिक लाई उद्यम एआई क्षेत्रमा अग्रणी कम्पनीका रूपमा हेरिँदै आएको थियो।
कर्पोरेट खर्चसम्बन्धी प्लेटफर्म र्याम्पले सार्वजनिक गरेको पछिल्लो तथ्यांकअनुसार उसले ट्र्याक गरेको उद्यम एआई खर्चमध्ये जीपीटी-६ आस्ट्राको हिस्सा करिब १३ प्रतिशत रहेको छ। एन्थ्रोपिक को क्लोड फेबलको हिस्सा करिब ८ प्रतिशत छ।
विकासकर्ताहरूको ट्राफिकलाई विभिन्न एआई मोडलतर्फ पठाउने व्यापक रूपमा प्रयोग हुने प्लेटफर्म ओपनराउटरमा पनि आस्ट्रा अघि बढेको छ। ओपनराउटरका अनुसार गत साता उसका प्रयोगकर्ताले एन्थ्रोपिक का मोडलको तुलनामा ओपनएआई का मोडलमा बढी खर्च गरेका थिए। दुई वर्षभन्दा बढी समयपछि पहिलोपटक उक्त मापनमा ओपनएआई अघि आएको हो।
यद्यपि केही विद्यमान लगानीकर्ता तथा एन्थ्रोपिक र ओपनएआई दुवैको आईपीओमा लगानी गर्ने अपेक्षा गरिएका व्यक्तिहरूले आस्ट्राले एन्थ्रोपिक लाई तत्काल ठूलो चुनौती दिने विश्वास नगरेको बताएका छन्।
उनीहरूका अनुसार उद्यम एआई उपकरणको बजारमा एन्थ्रोपिक को अग्रता ठूलो छ र ठूला कम्पनीहरूमा पहिलेदेखि प्रयोग भइरहेका सेवा प्रदायकलाई विस्थापित गर्न लामो समय लाग्छ।
एन्थ्रोपिक को वार्षिकीकृत आम्दानीको दर जुलाईको अन्त्यसम्म ६५ अर्ब डलरभन्दा बढी पुगेको थियो। सन् २०२५ को अन्त्यमा यो करिब ९ अर्ब डलर थियो। रोयटर्सले यसअघि जनाएअनुसार कम्पनीले सन् २०२८ मा करिब १९० अर्बदेखि २०० अर्ब डलरसम्म आम्दानी हुने प्रक्षेपण गरेको छ। ओपनएआई को वार्षिकीकृत आम्दानीको दर जुलाईमा ४० अर्ब डलर नाघेको थियो।
लगानीकर्ताहरूले एन्थ्रोपिक, ओपनएआई, अल्फाबेटको गुगललगायत प्रमुख एआई विकासकर्ताबीचको नेतृत्व नयाँ पुस्ताका एआई मोडल सार्वजनिक भएसँगै पटक–पटक परिवर्तन हुन सक्ने अपेक्षा गरेका छन्। त्यसैले कुनै एक कम्पनीको अग्रता लामो समयसम्म कायम नरहन सक्ने उनीहरूको भनाइ छ।
प्रकाशित: ५ आश्विन २०८३, सोमबार
