काठमाडौं ।
यसै साता क्यालिफोर्नियाको माउन्ट शास्ताबाट तीन जना पदयात्रीको उद्धार गरिएको छ। उनीहरूले आफ्नो यात्राको योजना बनाउन गुगलको एआई च्याटबट जेमिनी प्रयोग गरेका थिए। शिकागो ट्रिब्युनका अनुसार उनीहरूको उद्धार गरिएको हो।
सिस्कियु काउन्टी शेरिफ कार्यालयको रिपोर्टअनुसार तीन जना युवा बिहान ३ बजे पदयात्राका लागि हिँडेका थिए। दिउँसो १२ बजेसम्म शिखरमा पुग्न नसके फर्किन पदयात्रीलाई सुझाव दिइन्छ। तर उनीहरू साँझ ७ बजे शिखरमा पुगेका थिए।
त्यसपछि ती तीन जनाले अँध्यारोमा तल झर्ने प्रयास गरे। उनीहरूले बाटोबारे जानकारी लिन शेरिफ कार्यालयमा फोन गरे र रातभर मड क्रिक क्यान्यनमा बसे। भोलिपल्ट बिहान फरेस्ट सर्भिसका कर्मचारी र स्वयंसेवकहरूले उनीहरूको उद्धार गरेका थिए।
टेकक्रञ्चका अनुसार यी गलत निर्णयका लागि जेमिनाईलाई पूर्ण रूपमा दोष दिन सकिन्छ कि सकिँदैन भन्ने स्पष्ट छैन। तर शेरिफ कार्यालयका अनुसार पदयात्रीलाई जेमिनाईले उनीहरूको समूहलाई आवश्यक पर्नेभन्दा निकै कम खाना र पानी लैजान सुझाव दिएको थियो। विशेषगरी उनीहरूले योजना बनाएको आठ घण्टाको आरोहण धेरै दिनसम्मको यात्रामा परिणत भएको थियो।
शेरिफ कार्यालयले यात्रामा जानुअघि स्थानीय यूएस फरेस्ट सर्भिसको माउन्ट शास्ता रेन्जर स्टेसनमा सम्पर्क गरी सबैभन्दा सही जानकारी लिन सधैं उचित हुने बताएको छ। साथै, यात्राको योजना बनाउँदा एआईमा मात्र भर नपर्न पनि कार्यालयले सुझाव दिएको छ।
प्रकाशित: २२ भाद्र २०८३, सोमबार
