काठमाडौं ।
भोडाफोनथ्रीको इन्टरप्राइज व्यवसाय हेर्ने इकाइ भोडाफोन बिजनेसले सुरक्षा, क्लाउड र एआईलगायतका क्षेत्रमा बेलायतको इन्टरप्राइज बजारलाई लक्षित गर्दै टाटा कन्सल्टेन्सी सर्भिसेस (टीसीएस)सँग साझेदारी गरेको छ।
यो साझेदारीसँगै टीसीएस भोडाफोन बिजनेसको रणनीतिक साझेदारको समूहमा जोडिनेछ। दुवै कम्पनीले “दुवै संस्थाको क्षमता प्रयोग गर्दै बेलायतका इन्टरप्राइज ग्राहकको डिजिटल रूपान्तरण र ग्राहक अनुभव सुधार गर्ने” बताइएको छ।
टेलिकम्स डटकमका अनुसार दुवै कम्पनीले स्वास्थ्य सेवा, शिक्षा, वित्तीय सेवा, उत्पादन, खुद्रा व्यापार र राष्ट्रिय महत्वका पूर्वाधार क्षेत्रमा रहेका ग्राहकलाई लक्षित गर्नेछन्।
यसअन्तर्गत भोडाफोन बिजनेसको कनेक्टिभिटी, साइबर सुरक्षा, क्लाउड र डिजिटल सेवासँग टीसीएसको प्रविधि, परामर्श, क्लाउड, एआई, सार्वभौम प्रविधि र सिस्टम इन्टिग्रेसनसम्बन्धी विश्वव्यापी क्षमता जोडिनेछ।
“सँगै मिलेर भोडाफोन बिजनेस र टीसीएसले इन्टरप्राइजको वृद्धि, नवप्रवर्तन र राम्रो ग्राहक अनुभवलाई सहयोग गर्दै बेलायतको डिजिटल अर्थतन्त्रलाई बलियो बनाउन मद्दत गर्नेछन्,” विज्ञप्तिमा भनिएको छ।
यो साझेदारी बेलायतका नेटवर्कमा भोडाफोनथ्रीले गर्ने ११ अर्ब पाउन्ड लगानीमा आधारित रहेको बताइएको छ। भोडाफोनथ्रीको मर्जरअघि पनि यो लगानी कम्पनीको मुख्य सन्देशमध्ये एक थियो।
टीसीएसले भने डिजिटल रूपान्तरणका क्षेत्रमा ५० वर्षदेखि काम गर्दै आएको छ। कम्पनीका अनुसार उसले बेलायतमा प्रत्यक्ष र अप्रत्यक्ष रूपमा ४२ हजार रोजगारी सिर्जना गरेको छ।
दुवै कम्पनीले क्लाउड रूपान्तरण तथा माइग्रेसन, एआई र स्वचालन, साइबर सुरक्षा, नेटवर्क आधुनिकीकरण तथा डिजिटल पूर्वाधार, डेटा तथा एनालिटिक्स, आईओटी तथा कनेक्टेड बिजनेस एप्लिकेसन, म्यानेज्ड सर्भिस र सञ्चालन रूपान्तरणलगायतका क्षेत्रमा सहकार्य गर्नेछन्।
भोडाफोनथ्रीका बिजनेस डाइरेक्टर निक ग्लिडनले भने, “बेलायतका व्यवसायले आफ्नो बजार, ग्राहक र छिटो आधुनिकीकरण गर्नुपर्ने दबाब बुझेका साझेदार खोजिरहेका छन्। धेरै संस्थाका लागि चुनौती महत्वाकांक्षा होइन, कार्यान्वयन हो। सही प्रविधि छनोट गर्ने, त्यसलाई उचित रूपमा एकीकृत गर्ने र लगानीलाई मापनयोग्य परिणाममा बदल्ने विषय महत्वपूर्ण छ।”
“हामी रणनीतिक साझेदारको हाम्रो बढ्दो समूहमा टीसीएसलाई स्वागत गर्न पाउँदा खुसी छौं। यसले भोडाफोन बिजनेसलाई ग्राहकले छिटो अघि बढ्न, जटिलता घटाउन र आत्मविश्वासका साथ वृद्धि गर्न आवश्यक सेवा, विशेषज्ञता र डिजिटल अनुभव उपलब्ध गराउन सहयोग गर्नेछ,” उनले भने।
टीसीएसका बेलायत तथा आयरल्यान्ड प्रमुख विनय सिंह्वीले एआई र डिजिटल रूपान्तरण, सञ्चालन मोडलको विस्तार, गहिरो प्राविधिक विशेषज्ञता र विभिन्न उद्योगसम्बन्धी अनुभव प्रयोग गरेर भोडाफोन बिजनेस, टीसीएस र बेलायतका ग्राहकका लागि थप मूल्य सिर्जना गर्ने ठूलो सम्भावना रहेको बताए। यसबाट आम्दानी बढाउनुका साथै ग्राहक अनुभव सुधार गर्न सकिने उनले बताए।
यसै वर्षको सुरुवातमा भोडाफोन बिजनेसले स्टेडियम, लजिस्टिक्स हब, विश्वविद्यालय क्याम्पस र निर्माणस्थलजस्ता क्षेत्रलाई लक्षित गर्दै नयाँ ५जी नेटवर्क स्लाइसिङ सेवा सुरु गरेको थियो।
कम्पनीले इन्टरप्राइज ग्राहकका लागि व्यावसायिक ५जी नेटवर्क स्लाइसिङ सेवा उपलब्ध गराउने बेलायतकै पहिलो कम्पनी भएको दावी गरेको थियो। साथै, व्यस्त क्षेत्रमा रहेका व्यवसायका लागि ‘नेटवर्क बुस्ट’ सेवा पनि सुरु गरेको थियो। यसले भोडाफोनको ४जी र ५जी नेटवर्कमा व्यवसायसम्बन्धी डेटा ट्राफिकलाई प्राथमिकता दिने गर्छ।
प्रकाशित: ३० श्रावण २०८३, शनिबार
